"Барселона" ҳужумчисига ўзи ёқтирмаган жойдан таклиф тушди

"Барселона" ҳужумчиси Мемфис Депай бу клубда ўз ўрнини топиб кета олмаяпти. Унинг шартномаси 2022/2023 йилги мавсум охиригача мўлжалланган.

Молиявий нуқтайи назардан, Каталония клуби қишда нидерландиялик футболчини сотиб, мавжуд маблағни бошқа трансферларга йўналтирмоқчи. Ҳозирча Туркиянинг "Галатасарай" клуби Депайни сотиб олишга тайёрлигини билдирган. Туркия клуби ҳужумчини ўз сафида кўришни жуда ҳам истайди.

Бироқ Мемфисни Туркия чемпионатига ўтиш варианти қизиқтирмаяпти. Шу ўринда 28 ёшли футболчига ҳозирча бошқа таклиф ҳам йўқ. 2022/2023 йилги мавсумда у "кўк-анорранглилар" сафида 7 та ўйин ўтказиб, 4 та гол урди ва 1 та голли узатмани амалга оширди. 

У ҳаракат қилган Нидерландия ЖЧни чорак финал босқичиданоқ якунлашга мажбур бўлди. "Апельсинлар" ушбу босқичда Аргентина тўсиғидан ўта олмади.