"Барселона" Ольмонинг жароҳати ҳақида баёнот берди

"Барселона" матбуот хизмати Ла Лига 19-туридан ўрин олган "Атлетико"га (3:1) қарши ўйиндан сўнг жамоа ярим ҳимоячиси Даниэль Ольмо жароҳат олганини маълум қилди.

"Асосий таркиб футболчиси Даниэль Ольмо сешанба куни "Атлетико"га қарши ўйинда чап елкаси чиқиб кетди. Текширувдан сўнг, консерватив даволаш ҳақида қарор қабул қилинди. Тикланиш муддати бир ой атрофида бўлади", - дейилади "Барселона" расмий сайтидаги матбуот хизмати хабарида.

Футболчи 2 декабрь, сешанба куни "Атлетико"га қарши баҳсни асосий таркибда бошлади. Ольмо 65-дақиқада дарвозабон Ян Облакнинг ёнидан тўпни ўтказиб юбориб, ҳисобни 2:1 кўринишига келтирди, бироқ у ноқулай йиқилиб жароҳат олди.