“Барселона” қайсар футболчига оғир шарт қўйди

“Барселона” раҳбарияти клубни тарк этишни чўзиб юрган франциялик ҳимоячи Самюэль Умтитига ультиматум қўйди.

Унга кўра, футболчи бир ҳафта ичида ўзига янги жамоа топмайдиган бўлса, клуб амалдаги шартномани бир томонлама бекор қилади. Умтити ўзининг талабларини бажарадиган клублар таклифини ҳам инобатга олмаяпти. Унинг асосий мақсади шартномаси якунлангунга қадар  Каталонияда қолиш.

27 ёшли футболчи “Барса” мутасаддиларидан чемпионлик учун курашадиган ва Еврокубокларда мунтазам иштирок этадиган жамоа топишни талаб қилганди. Умтитига худди шу талабларга тўғри келадиган “Бенфика” харидор бўлди.

Қайсар футболчи уларнинг чорловини ҳам рад этди. Энди “Барса” ўйнамай катта маош олаётган ҳимоячини кетишга мажбур қилмоқчи.