“Сити” 25 нафар футболчи билан хайрлашади. Харидорлар учрашувга таклиф этилди
“Манчестер Сити” раҳбарияти сешанба куни ўтказиладиган ўзига хос кўргазмали учрашувга бир нечта клублар вакилларини таклиф қилди.
Унда тахминан 25 нафар футболчи иштирок этади ва Англия Чемпионшипи ҳамда Европа клублари ушбу ўйиндан сўнг ўзларига маъқул келган ўйинчилар ижараси ёки доимий трансфери бўйича музокаралар олиб бориш имкониятига эга бўлади.
Ҳозирча Жек Грилиш ва Калвин Филлипс ижарадан қайтганидан кейин ушбу ўйинда иштирок этиши маълум эмас, уларнинг келажаги ҳозирча мавҳум бўлиб турибди.
“Этиҳод”да 10 йил фаолият юритган Хосеп Гвардиола клубдан кетганидан кейин “шаҳарликлар”нинг келажаги қандай бўлиши ҳаммани қизиқтириб турибди. Янги бош мураббий Энцо Мареска эса, ўзининг дебют мавсумига ҳозирлик кўриш баробарида жамоани янги мавсумга пухта тайёрлашга бел боғлаган.
Клуб шу ёзнинг ўзида ўз тарихидаги энг қиммат трансферни амалга ошириб, “Ноттингем Форест”дан Эллиот Андерсонни 116 миллион фунт стерлинг эвазига харид қилганини тасдиқлади. Шунингдек, Жереми Монга учун ҳам “Лестер Сити”га 10 миллион фунт ва бонуслар тўланадиган бўлди.
Клуб афсоналари Жон Стоунз ва Бернарду Силва шартномалари якунланганидан кейин жамоани тарк этди. Натан Аке эса Англияни тарк этиб, фаолиятини Туркияда давом эттирадиган бўлди. Жорий трансфер ойнаси тугагунига қадар яна бир қатор футболчиларнинг кетиши кутилмоқда.
Журналист Алан Никсоннинг хабар беришича, “Манчестер Сити” кўргазмали учрашувга бир нечта клубларни таклиф қилган. Ушбу ўйинда клуб академиясининг бир қатор тарбияланувчилари ҳам ўз маҳорати ва истеъдодини намойиш қилади.
Учрашувни Англия Чемпионшипининг бир нечта клублари ҳамда Европа мусобақалари иштирокчилари кузатиши кутилмоқда. Бу ўйин уларга ижарага берилиши ёки доимий трансфер қилиниши мумкин бўлган иқтидорли футболчиларни яқиндан кўриш имконини беради.
Харидорлар учун кўрик вазифасини ўтаб берадиган ўйинда Дивайн Мукаса иштирок этиши кутилмоқда. У “Манчестер Сити” асосий жамоаси сафида олти марта майдонга тушган ва 2025/26 йилги мавсумнинг иккинчи қисмини ижара асосида Маресканинг собиқ жамоаси бўлган “Лестер”да ўтказган.
Шунингдек, Англия терма жамоасининг собиқ футболчиси Эмиль Хескининг ўғиллари –Жаден ва Рейган ҳам ушбу баҳсда қатнашади.
Ўтган мавсум ўртасида ҳимоядаги инқироз сабабли “Уотфорд”дан ижарадан чақириб олинган Макс Аллейн ҳам майдонга тушиши кутилмоқда. Бундан ташқари, лойиҳага Спайк Бритс, Чарли Грей ва Исса Каборе ҳам жалб қилинади.
“Эвертон” ва “Шеффилд Юнайтед”даги ижара муддатлари тугаб, яна Манчестерга қайтган Жек Грилиш ва Келвин Филлипс машғулотларни бошлаь юборган. Англия миллий терма жамоасида ўйнаш тажрибасига эга ҳар икки футболчининг клубдаги мавқеини Энцо Мареска ҳал қилади. Мареска таркибни чуқурлаштириш тарафдори бўлгани учун улар ёздан кейин ҳам “Сити”да қолиши мумкин.
Маълумки, Гвардиола даврида каталониялик мураббий ихчам таркиб билан ишлашни афзал кўрарди. Мареска эса ўхшаш тактика ва фалсафага эга бўлишига қарамай, жамоада кўпроқ футболчилар бўлишини истаяпти.
“Манчестер Сити” мавсумолди йиғини доирасида Осиёга йўл олади. Турне Гонконгда “Интер”га қарши ўйин билан бошланади. Бу баҳс 2023 йилги УЕФА Чемпионлар лигаси финалининг ўзига хос такрори бўлади.
Шундан кейин жамоа Сеулга йўл олади ва К-Лига юлдузлари жамоаси ва “Атлетико Мадрид” билан ўртоқлик учрашувини ўтказади.
“Манчестер Сити” ташкил қилаётган кўргазмали учрашувлар сўнгги йилларда Европа футболида тобора оммалашиб бораётганини алоҳида таъкидлаш лози. Улар орқали клублар ўз академияси тарбияланувчилари, ижарадан қайтган ва асосий таркибга кира олмаётган ўйинчиларини скаутлар ва бошқа клублар мутасаддиларига намойиш қилиб, трансфер ёки ижара жараёнларини тезлаштиришга ҳаракат қилади. “Манчестер Сити”нинг бу ташаббуси ҳам айнан шу мақсадга қаратилган.
Фикрлар