"Барселона" трансферлар бозорида фаол ҳаракат қилишга яқин

"Diario Sport" нашрининг ёзишича, "Барселона" клуби трансфер бозорида тўлиқ фаолият юритиш имкониятига яқинлашмоқда. Манбани маълум қилишича, клуб мустақил аудитори "Crowe Spain" томонидан VIP-жойлардан тушган маблағларни бу мавсум ҳисоботига қўшиш бўйича деярли ижобий хулоса олган.

Гап "Камп Ноу"даги 457 та VIP-жойни фойдаланиш ҳуқуқини бериб, 100 миллион евро ишлаб топиш операцияси ҳақида бормоқда. Клубнинг ишонч билдиришича, ушбу молиявий ҳаракат "1:1" қоидасига қайтиш ва трансфер бозорида эркин ҳаракат қилиш имконини яратади.

Шу билан бирга, каталонияликлар айрим футболчилар билан хайрлашишига тўғри келади, чунки маошлар жадвалида бўшлиқ яратиш талаб этилади.

Айни пайтгача клуб ушбу битимдан 58 миллион еврони қўлга киритган. "Forta Advisors Limited" – 28 миллион, "New Era Visionary Group" – 30 миллион евро тўлаган. Лекин қолган 42 миллион еврони қоплаш учун янги инвестор топиш осон бўлмаётгани таъкидланган.