"Барселона" Уругвайдан ҳимоячи сотиб олишга яқин

"Барселона" ва Уругвайнинг "Дефенсор Спортинг" клуби 19 ёшли чап қанот ҳимоячиси Патрисио Пасификони ижарага олиш бўйича келишувга эришди. Ушбу битим яқин соатларда якунланади. Бу ҳақда Sport.es хабар бермоқда.

Манбага кўра, агар футболчи "кўк-анорранглилар" сафида камида 10 та ўйин ўтказса, улар тахминан 2 млн еврога сотиб олиш имкониятига эга бўлади. Ушбу маблағ эвазига Каталония клуби келажакда кўтарилиш имконияти билан Пасификонинг 50 фоиз ҳуқуқини сотиб олиши мумкин бўлади. Уругвайлик футболчи 3 йиллик шартнома имзолаши кутилмоқда.

Пасифико 2024 йилнинг февралидан бери "Дефенсор Спортинг"нинг асосий жамоасида ўйнамоқда. Бу вақт ичида ҳимоячи барча турнирларда 40 та ўйинда майдонга тушиб, 2 та гол урган. Футболчининг клуб билан амалдаги меҳнат шартномаси 2028 йил охиригача мўлжалланган. transfermarkt порталида келтирилган маълумотларга кўра, футболчининг бозор нархи 650 минг еврони ташкил этади.