"Барселона" Ямални назоратга олади

Ўтган мавсумда барча "эл-класико"ларни ютган "Барселона"га сўнгги ўйиндаги мағлубият жиддий таъсир қилди. Бу ерда гап майдон ташқарисида содир бўлган воқеалардадир. Ламин Ямалнинг учрашув аввалидан билдирган фикрлари "Реал" футболчиларига қўшимча мотивация бўлди ва улар баҳсга доимгидан ҳам жиддийроқ тайёргарлик кўришди. Ўша куни Флик шогирдлари ўйин томонлама ҳам таслим бўлишди. Раҳбарият энди бу масала бўйича айрим ишларни амалга оширмоқчи. 

Биринчи навбатда клуб Ламиннинг тўлиқ тикланишини кутади. У Испания терма жамоаси сафида белидан жароҳат олганди. Раҳбарият вингерни ўтган мавсумги спорт формасини қайтаришни хоҳлайди. 17 ёшли Ямал кўплаб ўйинларда ҳал қилувчи футболчилардан бири бўла олган. Буни клуб қадрлайди ва шу сабабли ҳам унга 10-рақам берилган. 

"Эл-класико" олдидан билдирилган фикрлар "Барса"га ҳам ёқмаган. Энди футболчининг агенти Хорхе Мендеш билан биргаликда Ямалнинг омма олдида айтадиган гаплари назоратга олинади. Шунингдек, шахсий ҳаётини бу қадар очиқламасликка ҳаракат қилинади. 

Клубдаги айрим шахслар бу нарсалар атайлаб уюштирилганига ҳам ишонишади. Сабаби, ўша чиқишда "Реал" мухлиси бўлган Ибаи провакацион саволлар беришга ҳаракат қилган. Учрашувдан кейин стример айбни ўз бўйнига олди ва кечирим сўради: "Сантьяго Бернабеу"даги урушга сабабчи бўлдим. Жавобгарликни ўз бўйнимга оламан. Подкастни ташкил қилган мен эдим. Бунга полиция ҳам аралашди. Бошқа бундай қилмайман". 

Маълумот учун, ўша подкастда Ибаи Ламинга Сенингча, "Реал" читерми (қоидабузар, ғирром қиладиган), яъни ҳакамлар ёрдамида натижаларга эригадиган жамоами, деб сўради ва Ямал ҳа, дея жавоб қайтарди. Ўйиндан кейин Френки де Йонг бу ҳолатга шундай изоҳ берди: "Ўша гапларни Ламиннинг ўзи айтдими, оғзидан эшитдингизми, тўғридан-тўғри ундай, демади".

Ушбу ўйиндан кейин Дани Карвахаль билан нафақат Ямалнинг балки бошқа испанияликлар футболчиларнинг ҳам ораси бузилганга ўхшамоқда. Ламиндан кейин Педри ва Жерард Мартин инстаграмда Данига обунани қайтариб олган.

"Барселона" ушбу мавсум фақатгина "Реал"га мағлуб бўлмади. Жамоа бундан олдин ПСЖга ҳам енгилган эди, шунингдек, "Севилья"дан "тарсаки". Жароҳатлар захиранинг "тор"айишига олиб келди. Аммо бу ёшлар учун имконият ҳамдир...