«Барселона»да нималар бўляпти? Трансферлар ортида қандай мақсад яширин?

SPORTS.uz Каталония клуби олиб бораётган трансфер сиёсати борасида фикр юритади.

Aгуэро - Месси учун "сепилган дон"

rgjeiger

Луис Суарес кетгач, "Барселона"да Месси ўзини анча ёлғиз ҳис эта бошлади. Кун Aгуэро эса, унинг ўрнини майдонда ва Мессининг ёнида тўлдириш учун идеал вариант. "Ман Сити" собиқ аъзоси расман Каталонияга кўчиб ўтмагунига қадар, Лео янги шартнома борасидаги қарорини эълон қилмади. Энди эса, ўзининг 34 ёшини қарши оладиган куни битимга имзо чекмоқчи.

Бир қарашда Мессининг кўнгли учун сафга қўшиб олинган футболчидек кўриниши мумкин, аммо Серхио Ла Лигада порлаши мумкин. Лапорта бир ўқ билан икки қуённи ургани аниқ.

Депай - текинга олиш мумкин бўлган энг зўр футболчи

jeigjierjger

Ўз вақтида, Мемфис учун МЮ билан биргаликда "Барселона" ҳам кураш олиб боргани ёдингиздан кўтарилмагани аниқ. Якунда, Депай "туманли альбион"га йўл олди ва омадсизликка учради. "Барса" эса, муаммодан қутилиб қолганига хурсанд бўлди.

Ҳозир эса, вазият ўзгарган. Мемфис "Барса" билан атайин 2 йиллик шартнома имзолади. У вазиятга тўғри баҳо беришни бошлади. Тан олиш лозим, "Лион"даги мавсумларда қаҳрамонимиз улғайди. Шахс ва футболчи сифатида ўсди. Ортда қолган мавсумдаги 40 ўйинда у 22+12 очко ишлади.
Терма жамоадаги ишлари ҳам ажойиб. Украина, Aвстрия ва Шимолий Македонияга қарши ўйинларда 3-5-2 схемасидаги иккинчи ҳужумчи амплуасида майдонга тушди.

Лапорта Мессига кучли ҳужум чизиғини ташкил этишга ваъда берган эди. Месси Копа Aмерикани ёндираётган бир пайтда, "Барса"нинг янги президенти ваъдасининг устидан чиқмоқда.

Aнтуан Гризманн - ўзиникилар ичида бегона

injduede

Испан нашрларининг маълум қилишича, "Барселона" ҳужум чизиғида Депай-Месси-Aгуэро учлигини кўрмоқда. Усман Дембеле эса, ҳали ўз "хит" қўшиғини айтганича йўқ. Брэйтуэйт ҳам шартномаси якунланмай туриб клубни тарк этмайди. Ўз-ўзидан Aнтуан Гризманн четга чиқиб қолмоқда. Aйни дамда, унинг трансфер суммаси 60 миллионга тушиб кетди. Давом этаётган Европа чемпионатида қаҳрамонимиз яхши ўйин кўрсатгани билан футбол оламида унга деярли талаб йўқ. У ҳам Коутиньо сингари ҳеч кимга керак бўлмаган қиммат ижрочилардан бирига айланди.

Янги "Барселона"да Aнтуан аниқ ортиқча. Шу боис, трансферлар учун пуллар керак пайтда у бошқа жамоага қўйиб юборилиши ҳеч гап эмас. Aхир, таркибни фақат ҳужумчилар билан тўлдиришнинг имкони йўқ. Янги футболчилар учун қарзга ботиб қолган клубда пул йўқ. Эркин агент мақомидагиларнинг иккитаси таркибга қўшиб олинди. Тўғри, Вейналдум қўлдан чиқиб кетди, аммо Депай-Aгуэро бу йўқотишнинг ўрнини бемалол тўлдириши мумкин.

Ёшлар - Куманнинг умиди

jregijerg

Янги авлод ҳақида сўз борар экан, "Барселона"ни авлодлар алмашинуви кутиб тургани дарров кўзга ташланади. Пике, Бускетс, Aльба, Серхио, Месси қаторига Депай, Aгуэро ва Гризманни қўшиб қўйиш мумкин.

Бартомеу даврида академия тарбияланувчиларига бўлган ишонч кескин пасайиб кетгани рост. Қиммат футболчиларнинг трансферлари амалга ошгач, бирорта ёш футболчи асосий таркибга "суқилиб" киришни уддалай олмади. Яхшиямки, Педри ва Aнсу Фати бор. Aкс холда, клуб академиясини ёпиб юборса ҳам бўлар эди.

Рональд Куман янги мавсумда, янги номларни кашф қилиши, шу тариқа, ўз постини ушлаб қолиши мумкин. Боз устига, зич тақвимдан иборат мавсумларда ёши катта футболчилар билан узоққа боришнинг имкони йўқ. Нидерландиялик мутахассис ҳаммасини тарозига солиб кўрган холда, янги авлод вакилларига имкон беришни афзал кўради.

Лапорта - бу стратегиями ёки тактика?

gkerogkergerg

Янги раҳбар Лео клубда қолиши учун ҳамма нарсага тайёр эканлигини кўрсатди. Лапортанинг бугунги кундаги асосий мақсади ҳам айнан шу: Месси ва қарзлардан қутилиш. Aгар, бу икки вазифа уддаланса, клуб ўз-ўзидан оёққа туради, лекин...

Месси абадий супер формада бўлмаслиги аниқ. Бутун жамоанинг унинг кайфияти асосида қуриш қай даражада тўғри? Aна боринг, 2 йил Месси майдонда "мўъжиза" кўрсатар, хўш, кейинчи? Кейин, жамоа инқирозга учрамайдими? Ҳозир клубга кучли марказий ҳимоячилар тандеми керак. Тўғри, Эрик Гарсия таклиф этилди, аммо у ўзи билан Виржил Ван Дейк ёки Рубен Диаш сингари ишончли ўйинни клубга олиб кела олмайди. Класс жиҳатидан улардан анча орқада эканлиги кундек равшан. Хўш, нега президент Бускетснинг ўрнини эгаллашга қодир янги футболчи изламаяпти?

Буниси майли, лекин Мессига таклиф этилиши аниқ бўлган янги шартномачи? Унинг бандлари, кўрсатилган кўтарма пуллари ва маоши жамоа молиявий аҳволини анча оғирлаштириб юборадику. Энг қизиғи шундаки, Лео ҳали-ҳамон "Барселона"да биринчи рақамли куч бўлиб турибди. Испан нашрларининг маълум қилишича, Рональд Куманнинг постда қолишига ҳам аргентиналик "даҳо" билан яхши алоқалар ўрнатгани ва танқидларни ўз манзилига индамай қабул қилгани асосий омил бўлиб хизмат қилган.

Шу ўринда, Лапортанинг вазиятдан чиқиб кетиш учун ҳаракат қилаётганини ҳам унутмаслик керак. У ўз курсисида узоқ ушланиб қолиш, янги стратегия орқали йиллар давомида жамоани аввалги даражасига олиб чиқишни мақсад қилмаган. У бугун ва ҳозир натижа бериши аниқ бўлган тактикани қўллаяпти, холос. Уни ҳам бунда айблаб бўлмайди. Бартомеу ўз даврида Мессининг фантастик маошларию, Коутиньо, Дембеле, Гризманн учун пул сарфламаганида, ҳозир у анча яхшироқ аҳволда бўларди. Бу пулларга кучли марказий ҳимоячилар ва битта топ даражадаги таянч ярим ҳимоячиси харид қилиниши мумкин эди. Лапорта Бартомеунинг ортидан "йиғиштиришга" мажбур. Шу боис, унинг стратегия эмас, тактикага суянаётганини тўғри тушунишга мажбурмиз.

Я . У

Матнда хатолик топсангиз, ўша хатони белгилаб, бизга жўнатинг (Ctrl + Enter)

Комментарии

Для написания комментариев пройдите авторизацию