"Бавария" кўзлаган футболчи ўз жамоаси билан шартномасини узайтирди

Леверкузеннинг "Байер" клуби чилилик ярим ҳимоячи Чарлес Арангис билан амалдага шартномани узайтирди. Бу ҳақда клуб расмий сайти хабар тарқатмоқда.

Юқоридаги манбага кўра, томонлар имзолаган янги шартнома 2023 йилга қадар тузилган. Айтиш керакки, аввалги келишув 2 ойдан сўнг ўз ниҳоясига етарди.

Бундан аввалроқ, 31 ёшли Арангис ёзда “Бавария”га кўчиб ўтиши мумкинлиги ҳақида хабарлар тарқалган эди.

Арангис “Байер” сафида 2015 йилдан буён тўп суриб келмоқда. У ўтган давр мобайнида “доришунослар” сафида 130 та ўйинда майдонга тушди ва 12 та гол ҳамда 23 та голли узатмага муаллифлик қилди.