«Бавария» раҳбарияти Олисе келажаги бўйича қарор қабул қилди

«Бавария» раҳбарияти — клубнинг нуфузли арбоблари Ули Хёнес, Карл-Хайнц Румменигге, Герберт Хайнер, Ян-Кристиан Дризен, шунингдек спорт директори лавозимида ишлаётган Макс Эберль ва Кристоф Фройнд жамоа ярим ҳужумчиси Майкл Олисени сотиш масаласида ягона фикрга келди. Bild нашри ёзишича, улар француз вингерини трансферга қўймасликка қарор қилган.
 

Манбага кўра, мюнхенликлар раҳбарияти Олисени клубда сақлаб қолишни устувор вазифа сифатида кўрмоқда ва унга бўлаётган қизиқишларга қарамасдан, футболчини сотиш нияти йўқ.
 

Эслатиб ўтамиз, бундан аввал мадридлик «Реал» президенти Флорентино Перес келаси сешанба куни номаълум футболчи учун 150 миллион евро миқдорида таклиф беришини маълум қилган эди. Кейинчалик AS нашри ушбу футболчи айнан Олисе эканини хабар қилди, гарчи «Реал» раҳбари оммавий ахборот воситалари олдида бу футболчи Олисе эмаслигини алоҳида таъкидлаган бўлса-да.