“Бавария”да футболчиларга ёқадиган ўзгариш бўлди

“Бавария”нинг янги бош мураббийи Юлиан Нагельсманн жамоа футболчиларига ёқадиган янги қоидани қўллай бошлади.

Нагельсманн кутилмаганда футболчиларга уй учрашувларидан олдинги тунни ўз оилалари даврасида ўтказишга рухсат берди. Бунгача “Бавария” ўйинчилари ўз майдонидаги баҳсдан бир кун олдин меҳмонхоналарга йиғилаётган эди.

Мутахассислар мураббийнинг бу қарорини жамоани ўзига мослаштириш ва боғлаб олишга уриниш, дея баҳоламоқда.

“Лейпциг”нинг собиқ бош мураббийи “Бавария”га ўтиши билан биринчи совринини қўлга киритди. Нагельсманн шогирдлари 17 август куни Германия Суперкубоги учун баҳсда “Боруссия”ни 3:1 ҳисобида енгди.