Бахтиёр Ашурматов: "Андижон" ғалабага бўлган ишончи билан ҳайрон қолдирди"

Ўз тарихида илк бор Ўзбекистон Кубогини қўлга киритган “Андижон” клубининг ушбу муваффақияти анчагача тилларда достон бўлиши турган гап. Ҳалигача “Бургутлар”нинг мардонавор курашгани ҳақидаги фикрлар тингани йўқ.

Фарғонадаги “Истиқлол” стадиони иккинчи бор Ўзбекистон Кубоги финалини ўтказди. Дастлабкиси 2018 йилда бўлиб ўтган ва унда ОКМК “Пахтакор”ни 3:1 ҳисобида енгганди. Ўшанда олмалиқликлар бош мураббийи Бахтиёр Ашурматов эди. Мазкур мутахассис бу галги Кубок финали ҳақида тўхталиб ўтди.

- Сиз 2018 йили ОКМК бош мураббийи сифатида "Истиқлол" стадионида Кубок финалида "Пахтакор"ни ютгансиз. Ўшанда ҳамма "Пахтакор"ни фаворит сифатида кўришганди Бу сафар яна шу стадионида "Навбаҳор" "Андижон" билан ўйнади. Кўпчилик "Навбаҳор"ни фаворит сифатида баҳолади. Аммо "Андижон" ютиб кетди. Бу ҳақида нима деган бўлардингиз?

- Футбол шуниси билан ҳам қизиқки, ҳар доим ҳам фаворит жамоалар ютавермайди. Айниқса, финал ўйинларида. Финални ўзига бўлган ишончи юқори, финалда ғалабани кўпроқ хоҳлаган, иштиёқи юқорироқ, тактик томондан шу ўйинга тайёрроқ, омадлироқ жамоа ютади. Ҳамма “Навбаҳор”нинг имконияти юқорироқ деб ҳисоблаганди. Лекин финалда “Андижон” жамоаси “Навбаҳор”га ҳеч қайси жабҳада ютқазмади. “Андижон”нинг ўйинга бўлган тайёргарлиги максимал даражада эди.

- Бу финални ўзбек футболининг энг яхши рекламаси бўлди, дейиш мумкинми?

- Бу финални Ўзбекистон Кубоги финалларининг энг ёрқин финалларидан бири деб айтишимиз мумкин. Жамоалар охирги дақиқагача ғалаба учун курашишди. Ҳисоб 2:2 бўлиб турган вазиятларда Кубок ўйинларида жамоалар ўйин охирида таваккал қилишмайди ва қўшимча вақтларни кутишади. Лекин “Андижон” ғалабага бўлган ишончи билан хайрон қолдирди. Ўйиндаги икки жамоа мухлисларининг мухлислик даражаси, ўйин темпи, чиройли голлар Ўзбекистон футболининг яхши рекламаси бўлди, деб бемалол айтишимиз мумкин.

- Шахсан финалдан олдин нимани кутгандингиз?

- Финалдан олдин “Навбаҳор” таркиб бўйича кучлироқ, жамоа мураббийи Лушан мағлубиятлардан кейин фақат финални гапирмоқда, “Навбаҳор” юқори прессинг қилиб, ҳужумкор футбол ўйнаб “Андижон” жамоасини қийин аҳволга солиб қўйса керак, деб ўйлагандим. “Андижон” жамоаси томондан жуда эхтиёткор футбол кутгандим. Лекин “Андижон” жамоаси футболчилари майдонда номлар эмас, ўзига ишонган, охиригача курашадиган, иштиёқи юқори бўлган жамоа ғалаба қозонишини исботлади. Ҳамма “Навбаҳор”ни фаворит ҳисобласа-да, “Андижон” ҳар томонлама “Навбаҳор”дан кучлироқ кўринди. Хомяков эса яхши савиядаги мураббий эканлигини яна бир бор исботлади. Мураббийлар жангида Хомяков кучлилик қилди. Энг ачинарлиси, бир неча йил давомида “Навбаҳор” жамоасига катта маблағ сарфланишига қарамасдан ажойиб мухлисларга эга бўлган “Навбаҳор” яна совринсиз қолди. Мухлислар эса яна келажакка умид билан “Навбаҳор”ни чемпион бўлишини ёки Кубокни қўлга киритишини кутиб яшашади. Мухлислари ҳурмати ҳам “Навбаҳор” ҳужумкор футбол намойиш қилиши керак эди. Аммо  “Навбаҳор” мураббийининг ўйинга бўлган қараши тушунарсиз бўлди.

- "Андижон" жамоаси нимани эвазига ютиб кетди, деб ўйлайсиз?

- Айтиб ўтганимдек, “Андижон” жамоаси финал куни ҳар томонлама кучли кўринди. “Андижон” жамоасининг ғалабасида мухлисларнинг ҳам қўллаб-қувватлаши катта роль ўйнади, деб ўйлайман. Таркибида Искандеров каби маҳоратли футболчиси бўлган жамоа кўпроқ тўпни назорат килишга ҳаракат қилади. “Андижон” жамоаси “Навбаҳор”нинг тўпни назорат қилишига имконият бермади. “Навбаҳор”га бўш ҳудудлар қолдирмади. Яна бир тўғри қарорлардан бири “Андижон” чуқур ҳимояга ётиб олмади. Аксинча, “Навбаҳор ҳимоячиларига босим ўтказишга ҳаракат қилди. Александр Хомяковнинг тўғри тактика танлаганлиги, футболчиларнинг майдонда мураббий кўрсатмаларини тўғри бажарганлиги, катта иштиёқ, ғалабага бўлган чанқоқлиги, мухлисларнинг жамоани ажойиб қўллаб-қувватлаши финалда “Андижон”нинг ғалабасига сабаб бўлди, деб ўйлайман.