Бахтиёр Ҳамидуллаев: 10 киши қолганимизни ҳисобга олсак, натижадан розиман

Coca-Сola 19-тур доирасида “Андижон” жамоаси ўз майдонида “Сўғдиёна” билан куч синашди. Учрашувдан сўнг ташкил этилган матбуот анжуманида мезбонлар бош мураббийи Бахтиёр Ҳамидуллаев журналистларнинг саволларига жавоб қайтарди.

- Ўйин режамиз асосида бошланганди. Афсуски, иккинчи бўлимда ташаббусни рақибга бериб қўйдик. Шу сабабли муаммолар келишни бошлади. Айниқса, ҳимояда иккинчи қаватдаги курашларда ютқаздик. Натижада дарвозамиз олдида хавфли вазиятлар юз берди ва улардан бири гол билан якунланди. Бугун ютса бўладиган ўйин эди. Шунинг учун керакли очколарни йўқотдик.

- Биринчи бўлимда асосан Муҳаммадали Юлдашев орқали ҳужумлар ташкил қилинганди, иккинчи бўлимда эса унинг фаоллиги камайиб қолди...

- Ўйин охирларига бориб чарчаб қолди. Ўзи ҳам захирага чиқишни сўраб турмоқчи бўлаётганди. Натижада уни алмаштиришга мажбур бўлдик.

- Жамоа етакчиси Абдуллоҳ Олимов асосий таркибга киритилмади ва иккинчи бўлимда захирадан майдонга тушди. Бу нима билан боғлиқ?

- Унда озгина жароҳат бор эди. Олимовни тўлиқ ўйнашга кучи етмасди. Шу боисдан иккинчи бўлимда майдонга туширдик ва қўлидан келганича ёрдам беришга ҳаракат қилди.

- Жамоанинг ҳужум чизиғида ҳам фаоллик етишмади. Бу каби муаммолар устида тайёргарлик жараёнларида янада жиддийроқ ишланадими?

- Дуранг бўлгани учун ҳар хил саволлар кўпаяди. Агар бугун ютганимизда саволлар кўпаймасди. Асосан иккинчи қаватдаги курашларда ютқаздик.

- Рустам Қўчқоровни ҳужумга қўйдингиз, аммо ўринбосарлар баҳсида уни орқароқда кўргандик. Бу таваккалчилик эмасмиди?

- У бола асли ҳужумчи. Ўринбосарлар таркибимизнинг ҳимоя чизиғида муаммоларимиз кўп эди. Қўчқоров ақлли футболчи бўлгани боис ундан ҳимояда фойдалангандик. Мираҳматов кейинги ўйинда қатнашмайди. Шу сабабли чап қанотга кимни қўйиш борасида ўйлаб кўрамиз. Қўчқоров номзоди ҳам бўлиши мумкин.

- Тимур Усмоновнинг клубдан кетганига муносабатингиз қандай?

- Тимурга имконият бердик. Унга ўз укамдек қарадим, барча нарсаларни тушунтирдим. Кейин эса қандайдир ўзидан кетиб қолди, десак ҳам бўлади. Мана, кеча ўринбосарлар таркибида Нодир Мавлонов икки тайм ўйнади, иккита гол урди, лом-мим демади. У Усмоновдан катта. Тимурга ўринбосарларда ўйнашини айтганимда, йўқ, мен ўйнамайман деди. Шунда ё у ерда ўйнашни, ё кетишини танлаши ҳақида айтганимда, жамоамиздан кетди. Биз ҳам қаршилик қилмадик.

- Бугунги натижадан розимисиз?

- 10 киши қолганимизни ҳисобга олсак, ҳа, натижадан розиман. Агар тўлиқ таркибда бўлганимизда бугунги натижа қониқарсиз бўларди.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)