"Байер" мундиалда қатнашган футболчини олади

«Байер» (Леверкузен) клуби Франциянинг "Марсель" жамоаси билан аргентиналик ҳимоячи Факундо Медина трансфери бўйича музокараларни бошлади.

Le Phoceen нашри хабар беришича, ҳозирча икки жамоа ўртасида якуний келишувга эришилмаган, бироқ «Марсель» футболчининг кетишига қарши эмас.

Шу билан бирга, француз клуби ҳимоячини арзонга қўйиб юбориш ниятида эмас. «Марсель» Медина учун 20 миллион евро талаб қилмоқда. Бу сумма ўтган ёзда уни «Ланс»дан сотиб олишга сарфланган маблағга деярли тенг.

«Байер»нинг Мединага қизиқиши янгилик эмас. Немис клуби футболчини ҳали у «Ланс» сафида ўйнаётган пайтларданоқ кузатиб келган. Вилья-Фьоритода туғилган ҳимоячи «Марсель»га ўтганидан бери барча мусобақалар доирасида 26 та ўйин ўтказди ва бир бор голли узатма муаллифига айланди.