Беҳруз Каримов тўп тепадиган «Лугано» рақибини 4:0 ҳисобида мағлуб этди

Швейцариянинг «Лугано» клуби Суперлиганинг 10-турида ўз майдонида «Люцерн»ни қабул қилиб, йирик 4:0 ҳисобида ғалаба қозонди. Мазкур жамоа сафида Ўзбекистон миллий жамоаси ҳимоячиси Беҳруз Каримов ҳам ҳаракат қилмоқда.

Каримов учрашувни асосий таркибда бошлади ва 4-дақиқада сариқ карточка олди. 69-дақиқада ўзбекистонлик футболчи рақиб дарвозасини ишғол қилди, бироқ гол офсайд сабабли бекор қилинди. 74-дақиқада ҳимоячи алмаштирилди.

Учрашувда ҳисобни 12-дақиқада Даниэль дос Сантос очди. Иккинчи бўлимда Рубен Дантаснинг ўз дарвозасига киритган тўпи «Лугано» устунлигини оширди. 78-дақиқада дос Сантос дубль қайд этган бўлса, 87-дақиқада Дерек Монкада якуний ҳисобни ўрнатди.

Ушбу ғалабадан кейин «Лугано» 28 очко билан Швейцария чемпионатидаги пешқадамлигини мустаҳкамлади. Иккинчи ўринда бораётган «Янг Бойз» эса тўққизта учрашувдан сўнг 19 очко жамғарган.