Бекхэм Кэррикнинг "Манчестер Юнайтед"даги ишини юқори баҳолади

"Манчестер Юнайтед"нинг собиқ ярим ҳимоячиси Дэвид Бекхэм Майкл Кэррикнинг жамоа бош мураббийи сифатидаги иш натижаларига юқори баҳо берди.

Бекхэмнинг фикрича, мутахассис энг аввало футболчиларни руҳий жиҳатдан хотиржам қила олди ва унинг хатти-ҳаракатларида ўзига хос нафосат кўзга ташланмоқда.

"Бу каби жиҳатларнинг барчаси мураббий учун жуда муҳим. У жамоани қандай қилиб қайта йиғиб, уни бирлаштира олгани ҳақиқатан ҳам ҳайратланарли. “Юнайтед” мухлиси сифатида айта оламанки, айнан шу нарса бизга етишмаётган эди", — деди Бекхэм TalkSport’га берган интервьюсида.

Майкл Кэррик "Манчестер Юнайтед'ни 2026 йил бошида қабул қилиб олган. Унинг қўл остида жамоа 10 та ўйинда иштирок этиб, 7 та ўйинда ғалаба қозонди, 2 та баҳсда дуранг ўйнаган ҳолда, 1 та учрашувда мағлубиятга учради.

Натижада манкунианлар турнир жадвалининг ўрта қисмидаги ўринлардан учинчи поғонагача кўтарилишга эришди.