Белал Муҳаммаддан Муроджон Аҳмадалиевгача! Май ойида ўтказиладиган жанглар рўйхати билан танишинг

Май ойи қайноқ кунлар билан биргаликда қайноқ жангларни ҳам бизга тақдим этмоқчи. Бунга мисол қилиб келаётган турнир ва мусобақаларни келтириш мумкин. Эътиборингизга ММА ва бокс бўйича мазкур ойда бўлиб ўтадиган энг катта баҳсларни ҳавола этамиз.

11 май тонгига яқин соат 03:30 да "UFC 315" турнири старт олади. Унинг асосий тўқнашувида Белал Муҳаммад ва Жек Делла Мадалена ўзаро кураш олиб борса, "co-main event" жангида эса қирғизистонлик Валентина Шевченко франциялик Манон Фьорога қарши октагонга кўтарилади.

Айнан шу куни пойтахтимизнинг "Ҳумо арена" мажмуасида, соат 17:00 да "Octagon 72" турнири бошланади. Унда бир қатор ҳамюртларимиз турли рақибларга қарши супер жангларни ўтказади.

13 май куни Австралия профессионал бокс оқшомига мезбонлик қилади. Унинг асосий тўқнашувида Жей Опетая Клаудио Скуэога қарши рингга чиқади.

17 май куни ўтказиладиган "UFC Fight Night" турнири биз учун жуда муҳим. Чунки унда ҳамюртимиз Нурсултон Рўзибоев ҳам иштирок этиб, америкалик Дастин Штольцфус билан жанг қилади.

18 май санасидаги "UFC Fight Night" турнирида Гилберт Бёрнс ҳамда Майкл Моралес ўзаро тўқнаш келади. Бу баҳс ҳам жуда қизиқарли ўтиши кутилмоқда.

23 майда гўзал Париж "PFL Europe 2" турнирига мезбонлик қилади. Ажабланарлиси, унда "Манчестер Юнайтед" афсонаси ва Франция терма жамоаси собиқ футболчиси Патрис Эвра ММА даги дебютини ўтказади. Рақиб шу ҳафта эълон қилиниши мумкин.

Ойнинг охирги кунлари ёниши аниқ. Чунки 30 май санасида бўлиб ўтадиган катта бокс оқшомида ҳамюртимиз Муроджон Аҳмадалиев мексикалик Луис Кастильога қарши рингга кўтарилади. Айнан мана шу баҳсдан сўнг Аҳмадалиев япониялик Наоя Иноуэ билан тўқнашувга тайёрланади.

Юқоридаги рўйхат янада кенгайиши мумкин. Шу боис бизни кузатишда давом этинг!