Belarusdagi legioner ortga qaytdi, eronlik futbolchi Bekobodda yoxud "Metallurg" 5 ta transferni e’lon qildi (foto)

"Metallurg" jamoasi Superliga ikkinchi davra starti oldidan bir qator transferlarni e’lon qildi. Bu haqda klub matbuot xizmati xabar berdi. 

Shahzodbek Ubaydullaev Bekobodga qaytdi!

Bekobodning “Metallurg” jamoasi hujum chizig‘ida porlab, legionerga aylangan Shahzodbek Ubaydullaev uch yillik tanaffusdan so‘ng yana qadrdon jamoasiga qaytdi. Aynan bekobodliklar safida o‘ynagan kezlari O‘zbekiston milliy terma jamosiga chaqiruv olgan Ubaydullaev “Metallurg” bilan yangi cho‘qqilarni zabt etishga bel bog‘lagan.

Professional faoliyati davomida “Mash’al”, “Andijon”, “Metallurg”, “Shaxtyor” (Soligorsk, Belarus), “Energetik-BGU” (Minsk), “Neftchi” jamoalarida to‘p tepgan Ubaydullaevning hisobidagi o‘yinlar soni 88 tani tashkil etadi. U raqiblari darvozasiga 24 ta gol kiritgan. O‘zbekiston milliy terma jamoasida 3 bor maydonga tushib, 1 marta muvaffaqiyat qozongan.

Rasman: Sardor Abduraimov “Metallurg” bilan shartnoma imzoladi!

So‘nggi uch mavsumni “Turon” jamoasida o‘tkazgan tajribali pleymeyker Sardor Abduraimov ikkinchi davra arafasida Bekobodning “Metallurg” jamoasidan tushgan taklifga rozilik bildirdi va shartnoma imzoladi. Tajribali yarim himoyachi endilikda “Metallurg”ning asosiy figuralaridan biriga aylanishi kutilyapti.

Professional futbol faoliyatini Qashqadaryo viloyatida boshlagan Abduraimov ko‘p yillar voha futboli taraqqiyotiga munosib ulush qo‘shdi. “Mash’al” va “Nasaf” jamoalari sharafini himoya qildi. 2020 yilning birinchi davrasini “Bunyodkor”da o‘tkazib, yana ortiga qaytdi. 2021 yilning ikkinchi yarmidan e’tiboran esa Yaypanning “Turon” jamoasi sharafini himoya etib keldi.

Iskandar Shayqulov - “Metallurg” a’zosi!

Tajribali himoyachilardan biri Iskandar Shayqulov davralar oralig‘ida “So‘g‘diyona” jamoasi bilan shartnomasini bekor qildi va Bekobodning “Metallurg” klubi o‘yinchisiga aylandi.

Surxondaryo futboli tarbiyalanuvchisi Iskandar Shayqulov professional futbol faoliyatini “Mash’al”da boshlagan. Ikki mavsum muborakliklar safida to‘p tepgan Iskandar 2015 yilda “Paxtakor” a’zosiga aylandi. Ammo “sherlar” safida to‘p tepish unga nasib etmadi va yana “Mash’al”ga qaytib ketdi. 2017 yilgacha vohada faoliyat yuritgan Shayqulovga 2018 yilda “Neftchi”dan qiziqish bo‘ldi. Bir yil vodiyda o‘ynagan Iskandar 2019 yilda “So‘g‘diyona” bilan shartnoma imzoladi.

177 uchrashuvda maydonga tushgan Shayqulov raqiblar darvozasiga 6 ta gol urgan. 6 marta O‘zbekiston MTJ uchrashuvlariga jalb etilgan.

Muhammadaziz Ibrohimov “Metallurg” taklifini qabul qildi!

Yosh iqtidorli yarim himoyachilardan biri Muhammadaziz Ibrohimov faoliyatini “Metallurg” bilan bog‘lashga qaror qildi. Muhammadaziz O‘zbekiston olimpiya terma jamoasi a’zosi sanaladi.

Ibrohimov professional futbol faoliyatini “Olimpik” jamoasida boshladi. "Olimpiyachilar" safida Pro ligada zafar quchdi. Superligada ham jamoa ikki mavsumdirki, ishqibozlar e’tiborini qozonib kelyapti. Jamoa muvaffaqiyatida katta hajmdagi ishni bajaruvchi yarim himoya chizig‘i vakillarining, xususan Muhammadazizning ham hissasi beqiyos bo‘ldi. Fikrimizning dalili sifatida bu yilgi mavsumning birinchi davrasi statistikasiga nazar tashlash kifoya. Ibrohimov barcha 13 ta uchrashuvda maydonda faoliyat olib bordi.

“Metallurg” Danial Mahini bilan shartnoma imzoladi

"Superliga – 2023" mavsumining ikkinchi davrasi oldidan “Metallurg” o‘z tarkibini eronlik yana bir o‘yinchi bilan mustahkamladi. Eron Islom Respublikasi milliy terma jamoasining sobiq o‘yinchisi Danial Mahini bekobodliklar safiga kelib qo‘shildi.

Professional faoliyati davomida Eron Pro ligasida 58, Azadegan ligasida 23, OFK chempionlari ligasida 8, Xafzi kubogida 3, Superkubokda 1 ta o‘yinda maydonga tushgan Mahini jami 92 ta o‘yinda qatnashgan. “Eronjavon”, “Istiqlol” (Xuzeston), “Saypa”, “Malavan”, “Paykon”, “Arman Gohar” jamoalarida to‘p tepgan.