Bellingem bizga oʻt, katta shartnoma va har yili 15 million yevro olasan!

“Manchester Yunayted” yozgi transferlar davrida “Real”da o‘ynayotgan Jud Bellingemni o‘z safiga qo‘shib olish uchun madridliklarga 200 million yevro miqdorida badal puli to‘lashga tayyorligi haqida ma’lumotlar tarqatilmoqda.

Bir necha manbada keltirilishicha, agar manchesterliklarning rejasi amalga oshib, Bellingem “Old Trafford”ga keladigan bo‘lsa, unga olti yillik shartnoma va har mavsum uchun soliqlardan keyin qo‘liga 15 million yevro tegadigan darajada maosh va’da qilindi.

Ta’kidlash joizki, “Yunayted” 22 yoshli pleymeykerga taklif qilayotgan maosh Bellingemning “Real”da olayotgan mablag‘idan ikki baravar ko‘p.

Bellingem “Real”ga 2023 yilning yozida Dortmundning “Borussiya” klubidan ko‘chib o‘tgan edi. Uning amaldagi shartnomasi 2029 yilning yozigacha davom etishi belgilangan. Transfermarkt portali ma’lumotlariga ko‘ra, uning bozor qiymati 160 million yevroni tashkil qiladi.