Беллингем Мбаппе каби “Реал” шифокорларидан норози бўлиб, Лондонга кетиб қолди

“Реал” ярим ҳимоячиси Жуд Беллингем клуб тиббий штаби ишидан норози бўлиб, Лондондаги шифокорларга мурожаат қилди. Бу қарор ҳужумчи Килиан Мбаппенинг ҳам клуб шифокорлари қўйган ташхисдан норозилигидан кейин қабул қилингани айтиляпти.

Tribuna нашри хабарига кўра, бу ҳолат “Реал” ичидаги муайян муаммолардан далолат беради.

Манба маълумотида айтилишича, Беллингем жароҳати бўйича муқобил (иккинчи) тиббий хулоса олиш учун Буюк Британияга жўнаб кетган. Футболчи тикланиш жараёни чўзилиб кетган, деб ҳисобламоқда ва шу сабабли англиялик мутахассис билан маслаҳатлашишга қарор қилган.

Лондонга сафарда унга мадридлик клуб тиббий хизмати раҳбари Нико Михич ҳамроҳлик қилмоқда. Бироқ иккинчи фикр олишга мурожаат қилинганининг ўзи “Реал” тиббий бўлимида тизимли муаммолар борлигини кўрсатади.

Беллингем ва унинг вакиллари амалдаги даволаш кутилган натижани бермаётганидан хавотир билдирмоқда. Унинг майдонга қайтиш муддати чўзилиши ярим ҳимоячининг мавсумнинг ҳал қилувчи ўйинларида иштирок этишига халақит қилиши мумкин.

Эслатиб ўтамиз, Беллингем 1 февраль куни “Райо Вальекано”га қарши учрашувда сон орқа қисми мушагидан жароҳат олган ва ўйиннинг 10-дақиқасида майдонни тарк этишга мажбур бўлган эди.