"Бенфика" "Реал"га қарши ўйиндаги ирқчилик ва тартибсизликлар учун жазоланди

УЕФА интизом қўмитаси Лиссабонда бўлиб ўтган Чемпионлар лигаси плей-офф босқичи доирасида бўлиб ўтган "Бенфика" ва "Реал Мадрид" ўртасидаги баҳс якунлари бўйича қарор чиқарди. Унга кўра, португал клуби мухлисларининг хатти-ҳаракатлари учун молиявий ва маъмурий жазоларга тортилди.

Жами жарима миқдори 48 минг еврога тенг бўлди. Шундан 40 минг евро — трибуналарда ирқчилик ва камситиш ҳолатлари учун жазо сифатида белгиланган. Қўшимча равишда клубга яқинлашиб келаётган еврокубок уй ўйини учун 500 та чипта сотиш тақиқланди. Яна 8 минг евро мухлислар томонидан лазер кўрсаткичлардан фойдаланилгани учун жарима қилинди.

Маълумот учун, 17 февраль куни Лиссабонда бўлиб ўтган учрашув "Реал"нинг 1:0 ҳисобидаги ғалабаси билан якунланган эди. Ягона голни Винисиус Жуниор киритган бўлиб, унинг голдан кейинги нишонлаши тартибсизликларга сабаб бўлди. Бразилиялик форвард трибуналар томон провокацион ишоралар қилди ва шундан сўнг ирқчилик ҳақоратларига дуч келди. У бу ҳақда дарҳол бош ҳакамга хабар берган.