Бенземага Туркиянинг гранд клуби жиддий қизиқиш билдириб, музокараларни бошлашга тайёр!

Туркиянинг машҳур "Фенербахче" клуби ҳужум чизиғини кучайтириш мақсадида Карим Бенземани ўз сафига қўшиб олишни кўзламоқда, деб хабар берди "Fotomaç".

Манбага кўра, жамоа бош мураббийи Доменико Тедеско клуб президенти Садеттин Саранга жамоага ҳужумларни самарали якунлай оладиган форвард кераклигини маълум қилган. Бу эҳтиёж Юссеф Эн-Несирининг ҳозирги шакли, Жон Дюраннинг жароҳати ва Женк Тосуннинг таркибдан чиқарилиши билан боғлиқ.

Мавжуд номзодлар муҳокамасидан сўнг асосий вариант сифатида Карим Бензема танланган. Франциялик форварднинг "Ал-Иттиҳод" билан амалдаги шартномаси мавсум охирида тугайди. Шу боис, "Фенербахче" яқин вақт ичида унинг агентлари билан алоқага чиқишни режалаштирган. Агар ижобий жавоб олинса, трансфер бўйича музокаралар давом эттирилади.

Аввалроқ, 37 ёшли Бензема ўз фаолиятининг сўнгги босқичини Европада ўтказишни хоҳлаётгани ҳақида хабар қилинган эди.