Бернарду Силва Абдуқодир Ҳусанов ва Макс Аллейннинг ўйинини юқори баҳолади

"Манчестер Сити" сардори ва етакчиси Бернарду Силва "Ньюкасл"га қарши тўқнашувдан сўнг жамоанинг икки марказий ҳимоячиси Абдуқодир Ҳусанов ва Макс Аллейннинг ўйинини юқори баҳолади.

"Абдуқодир Ҳусанов ва Макс Аллейн сўнгги ўйинларда ажойиб ҳаракат қилди. Улар кўрсатган шахсият ва характер — бу осон иш эмас. Бундай даражада, шунча босим остида жамоага кириб келиш, орқадан ўйин қуришга журъат қилиш, барқарор ва ишончли ўйнаш жуда қийин.

Яна бир бор жуда оғир стадионда ўйнадик, бу ерда ўйнаш қанчалик мураккаблигини биламиз, аммо улар жуда яхши ҳаракат қилди. Антуан Семеньо ҳам худди шундай. Жеймс Траффорд эса бир нечта муҳим сейв қилди ва бугун биз учун жуда зўр ўйин кўрсатди", - дея фикр билдириб ўтди португалиялик футболчи.

Эслатиб ўтамиз, бугун "шаҳарликлар" Семеньо ва Шеркининг голлари эвазига 2:0 ҳисобида зафар қучиб, жавоб беллашуви олдидан ўзлари учун қулай имконият яратиб олишди.