Биласизми? "Аталанта" 1996 йилдан буён илк бор Италия кубоги финалига чиқди

Аввал хабар берганимиздек кеча “Аталанта” Италия кубоги ярим финал босқичи доирасида “Фиорентина”ни 2:1 ҳисобида енгди ва финалга йўл олди.

Эътиборлиси, “Аталанта” шу тариқа 23 йиллик танаффусдан сўнг яна кубок финалида ўйнайдиган бўлди. Таъкидлаш лозимки, улар сўнгги бор 1996 йилда Италия кубоги финалида иштирок этишган эди.

Эслатиб ўтамиз, “Аталанта”ни финалда “Милан”ни мусобақадан чиқариб юборган “Лацио” кутмоқда. Ушбу жамоалар ўртасидаги баҳс 15 май куни Римдаги “Стадио Олимпико” ўйингоҳида бўлиб ўтади.