"Битта таклиф бор, лекин..." ёхуд Виктор Кумиков жамоасидаги ўзбекистонлик футболчини мақтади

Ўзбек ишқибозларига бегона бўлмаган Виктор Кумиков ўтган йилдан буён Қозоғистоннинг “Қайсар” жамоасига бош мураббийлик қилиб келяпти. Ўзбекистонда “Машъал”, “Насаф”, ОКМК ва “Андижон” клубларида фаолият олиб борганини яхши биласиз.

Виктор Балютович ҳозир жамоаси билан янги мавсумга тайёргарликка қизғин киришган. Декабрь ойида Туркиянинг Анталия шаҳрида йиғин ўтказганди ва январь ойида ҳам яна Анталияда шуғулланишмоқда. Мутахассис у ердаги фаолияти ва яна бир қанча саволларга жавоб берди.

- Виктор Балютович, Қозоғистондаги фаолиятингиз қандай? Ўтган йили жамоангиз билан чемпионатни 6-ўринда тугатдингиз. Бу сизни қониқтирдими?

- Ўзингиз яхши биласиз, “Қайсар” фақат 2023 йилга келиб Қозоғистон премьер-лигасида ўйнаш имконини қўлга киритган. Шунинг учун ҳам биринчи йилдаги натижа ҳаммани қаноатлантирарди!

- Сизни клубдан кетишингиз мумкинлиги ҳақида эшитиб қоляпман. Буни тасдиқлай оласизми ёки миш-мишми?

- Ҳа, менда шартнома имзолаш билан боғлиқ битта таклиф бор, лекин бундан кейин ҳам Қизил Ўрдада қолиб ишламоқчиман.

- Виктор Балютович, Ўзбекистондан сизга яна таклиф борми?

- Ўзбекистондан ҳеч қандай таклиф бўлмади.

- Янги мавсумда олдингизга қандай мақсад қўйилган?

- Ўтган йилдагига нисбатан юқорироқ ўринни эгаллашга ҳаракат қиламиз!

- Айни пайтда қўл остингизда ўзбекистонлик футболчи Шохназар Норбеков шуғулланяпти. У ҳақида фикрингиз қандай? “Қайсар”да қоладими?

- Норбековни ОКМКдаги ўзаро иш орқали яхши танийман. Ундаги сифатлар мени тўлиқ қаноатлантирарди. У тезкор ва ишлашни билади. Бу асосий масала, қолганини ҳал қиламиз.

- Жамоангизга яна бошқа ўзбекистонлик ўйинчиларни таклиф қилиш режангиз борми?

- Ҳозир бундай номзод йўқ. Қолаверса, бизнинг клуб унчалик бой эмас ва ўзимиз сафда кўришни истайдиган ўйинчиларни сотиб олишга қурбимиз етмайди. Шу боисдан ҳам бюджетдан келиб чиққан ҳолда ишлашимизга тўғри келади.

- Дарвоқе, собик клубингиз – “Андижон”ни кузатиб бордингизми?

- “Андижон”нинг ўйинларини Қозоғистонда кўрсатишмайди. Аммо клубнинг натижалари ва мусобақа жадвалидаги мавқеини кузатиб бордим. Жамоа муносиб иштирок этди.

Шуҳратбек Жўраев.