Ҳусанов “Манчестер Сити” трансфер сиёсатига жиддий таъсир ўтказяпти

“Манчестер Сити”да ўтган йилннг 20 январида жамоага Абдуқодир Ҳусановни келиши билан бошланган таркибни янгилаш ва авлодлар алмашинув жараёни ҳамон давом этмоқда.

Охирги бир йилда “шаҳарликлар” сафини узоқ йиллар клубда муваффақиятли фаолият юритган бир неча тажрибали юлдузлар, хусусан, Кайл Уокер, Кевин де Брейне, Скотт Карсон, Жек Грилиш, Мануэль Аканжи, Эдерсон, Илкай Гюндоған, Штефан Ортега, Келвин Филлипс тарк этиб улгурди.

Клуб мутасаддилари яна бир гуруҳ ёши катта ўйинчилар – Жон Стоунз, Бернарду Силва, Натан Аке, Матео Ковачич, ҳатто “Олтин тўп” соҳиби Родри билан хайрлашишга ҳам тайёрланмоқда.

“Манчестер Сити” ўтган йили қишда Абдуқодир Ҳусановни олганида экспертлар бу трансферни катта таваккал сифатида баҳолаган эди. Амалда, ўзбек футболчиси катта салоҳият эгаси эканини намойиш қила олди ва жамоа ҳимоя чизиғида кадрлар муаммосига дуч келган мураккаб вазиятларда айнан Ҳусанов катта саҳнага чиқди.

Нуфузли манбалардан бири – cityxtra.co.uk сайти эксперти Жуд Ноблнинг ёзишича, Абдуқодир Ҳусановнинг трансфери ўзини оқлаганидан кейин “Манчестер Сити” раҳбариятининг трансфер сиёсатида кескин ўзгариш бўлди. Энди клуб спорт бўлими асосан мунтазам ўсишга эриша оладиган, узоқ йиллар жамоа шарафини ҳимоя қилиш имкони бўлган, ҳар қандай услуб ва позицияга мослага оладиган ёш ўйинчиларни олишга алоҳида эътибор қарата бошлади.

- Сўнгги вақтларда “Манчестер Сити” ёш ҳимоячиларни жалб қилиш ва ривожлантиришга тайёр эканини намоён этмоқда, уларнинг маҳоратини сайқаллаб, яқин йилларда асосий таркибнинг муҳим ўйинчиларига айлантиришни мақсад қилган.

Бу айниқса, 2025 йил қишки трансфер ойнасида яққол кўринди, ўшанда Абдуқодир Ҳусанов ва Витор Рейс “Манчестер Сити” томонидан жами 62,9 миллион фунт стерлингга сотиб олинди, бу клубнинг ҳимояда ёш истиқболли футболчиларни ривожлантиришга бўлган интилишини кўрсатди, - деб ёзди Жуд Нобл.

TEAMTALK нашри маълумотига кўра, Уго Виана ва Пеп Гвардиола Абдуқодир Ҳусановдан кейин жамога қўшиб олмоқчи бўлган янги истиқболли ёш футболчи сифатида 18 ёшли марказий ҳимоячи Рууд Нистадни нишонга олди.

“Твенте” ўйинчиси бу мавсумда асосий таркибга кириб борганидан сўнг Европадаги энг истиқболли ёш ҳимоячилардан бирига айланди ва унинг ўйинлари кўплаб элита скаутлик бўлимлари эътиборини тортди.

Аввалроқ, Каталониянинг гигант клуби “Барселона” ушбу ёш футболчини сотиб олишга энг кўп қизиқиш билдирган ва ҳимоячини Испанияга олиб келиш учун барча саъй-ҳаракатларни амалга ошираётгани айтилган эди. Бироқ Ла Лига клуби молиявий аҳволидан келиб чиқиб,  ёш ижрочи учун 10 миллион евродан ортиқ маблағ тўлашни истамаслиги айтилмоқда.

Қолаверса, Нистаднинг ўзи ҳам Каталонияда унга таклиф этилган лойиҳанинг мақсадга мувофиқлигига ишонмаган, бу эса “Ханс-Дитер Флик жамоасига ўтиш унинг карьерасига ҳақиқатан ҳам фойда келтирадими?”, деган саволларни туғдирмоқда.

Айнан шу иккиланиш қитъа бўйлаб ёш иқтидорлар билан ишлашда катта тажрибага эга бўлган “Бавария”, “Боруссия Дортмунд” ва “РБ Лейпциг” каби немис клубларига ҳам Нистадга даъвогарлик қилиш имкониятини очиб берди.

Шунга қарамай, бугунги кунда нидерландиялик вундеркиндга энг катта қизиқишни Англия  Премьер-лигаси клублари билдирмоқда. Хусусан, “Челси”га эгалик қилувчи BlueCo компанияси ҳамда “Манчестер Сити” ва яна бир неча клуб тегишли бўлган City Football Group холдинги мутахассислари бу ўйинчини нишонда ушлаб турибди.

Англиянинг “Тоттенхэм”, “Астон Вилла”, “Ньюкасл”, “Брайтон” ва “Брентфорд” каби жамоалари ҳам Нистаднинг атрофидаги вазиятни кузатиб бормоқда ва яна Европанинг  бир қатор клублар мавсум бошидан бери унинг ўйин барқарорлигини текшириш учун бир неча бор скаутлар юборган.

18 ёшли футболчи асосий жамоада фақат шу мавсум дебют қилганига қарамай, чап марказий ҳимоячи позициясида ўзини энг яхши томондан кўрсатди. Нистад ўзининг сабр-тоқати, етуклиги ҳамда қарор қабул қилиш маҳорати билан мухлису мутахассисларни ҳайратда қолдирди. Бу сифатлар унинг позицияси учун жуда муҳим, аммо унинг ёшида кам учрайди.

Нистаднинг “Твенте” билан ҳозирги шартномаси 2027 йилнинг ярмигача амал қилади ва Нидерландия клуби у билан янги узоқ муддатли янги битим тузишга интилмоқда. Бироқ бу осон бўлмаслиги мумкин, чунки Нистанднинг манфаатларини ҳимоя қилаётган агентлар ёш юлдузини қўлга киритиш учун Европанинг етакчи клублари кураш олиб бораётгани жуда яхши билади.

Агар бу курашда “Манчестер Сити” ютиб чиқадиган бўлса, Рууд Нистад “шаҳарликлар” учун “иккинчи Ҳусанов” бўлиши ва янги кашфиёт сифатида эътироф этилиши мумкин.

Кўпчилик шубҳа қилган Ҳусанов қандай қилиб “Манчестер Сити”нинг энг муҳим ўйинчисига айланмоқда?

Ҳусановнинг баёнотидан кейин унинг “Сити”даги келажаги қандай бўлади?

Европада Шомуродовга эътибор қаратишди

Супергол урган Шомуродов: Овора бўлма, барибир етолмайсан!