Бокс бўйича жаҳон чемпионатининг "сирли" жамоаси Мўғулистон ҳақида ёҳуд бош мураббий қандай натижани кўзламоқда?(Видео)

Хабарингиз бор, ўзбекистонлик мураббий Аброр Турсунпўлатов  Мўғулистон бокс терма жамоаси бош мураббийи бўлиб фаолият олиб бормоқда. Айни кунларда мўғулистонликлар Тошкентда ташкил этилувчи жаҳон чемпионатида иштирок этиш учун етиб келган ва машғулотларни олиб боришмоқда. Биз фурсатдан фойдаланиб, Аброр Турсунпўлатов билан қисқача суҳбатда бўлдик.

Умуман жаҳон чемпионатига тайёргарлик қандай бўлди?

Ҳали ҳам тайёргарликни давом эттирмоқдамиз. Биз ҳаммадан олдин Ўзбекистонга етиб келдик. Қирғизистондаги халқаро турнирдан кейин Мўғулистонга қайтмадикда тўғри Ўзбекистонга келавердик. Чорвоқда 13 кун мобайнида машғулотлар олиб бордик. Кейин Тошкентда Ўзбекистон терма жамоаси билан ҳамкорликда 8 кун йиғин ўтказдик. Ҳозирда, Бекободда тайёргарликни давом эттираяпмиз. Бир сўз билан айтганда барчаси аъло даражада бўлди.

Ўзбекистон терма жамоаси билан қўшма ҳамкорликдаги машғулотлар қай даражада фойдали бўлди?

Юқорида айтиб ўтганимдек, 8 кун биргаликда ишладик, яхши спарринглар бўлди. Шубҳасиз, юқори даражадаги боксчилар билан ишлаш жуда фойдали бўлади. Биз ўзимиз учун керакли бўлганини олдик. Ўз ўрнида бизга яқиндан ёрдам берганлиги учун Ўзбекистон терма жамоаси бош мураббийи Тўлқин Қиличевга, Раҳматжон Рўзиохуновга ўз миннатдорчилигимни билдириб қоламан.

- Мўғулистон бокс федерацияси томонидан жаҳон чемпионатига қандай қаътий натижа қўйилди?

- Имкон қадар ижобий натижалар қайд этишимизни исташади ва биз бунга ҳаракат қиламиз.

- Мўғулистон терма жамоаси жаҳон чемпионатига барча 1- рақамли боксчилари билан ташриф буюрдими ёки қайсидир ҳолатлар туфайли қолиб кетганлар бўлдими?

- Барча етакчилар билан ташриф буюрдик. Биргина -48 кг вазн тоифаси озгина мунозарали эди. Қирғизистондаги турнир мобайнида нейтрал ҳакамлар орқали кўриб, ким иштирок этишини аниқлаб олдик.

- Мураббий сифатида қайси вазн тоифаларида совриндорлар қаторидан жой олиш имкониятинглар юқори?

- Мўғулистон терма жамоасида ҳар доим енгил вазн тоифаларида кучли боксчилар бўлган. Оғир вазн тоифасида ҳам яхши боллар бор. Бу йил +92 кгда ҳам иштирокчимиз бор. Унинг илк катта мусобақаси, умид қиламанки, у ҳам ўзини яхши томондан кўрсата олади. Мураббий сифатида камида 3 та медални кўзлаб келганмиз.

- Мўғулистон терма жамоасининг жаҳон чемпионатида иштирок этувчи таркиби:

- 48 кг: Г. Ган Эрдэнэ

- 51 кг: Х.Энхмандах

- 54 кг: Д.Ганболд

- 57 кг: Х.Энх-Амар

- 60 кг: Т.Энхтөр

- 63.5 кг: Б.Чинзориг

- 67 кг: Б.Мишээлт

- 71 кг: О.Бямбаэрдэнэ

- 75 кг: Ж.Отгонжаргал

+92 кг: Х.Бекнур