Боксчи ва хоккейчиларни ҳайратда қолдирган эгизаклар қиссаси

2020 йилда «Байер» жамоаси ҳимоячилари - эгизак Бендерлар бутсаларини михга илгани ҳақида расман маълум қилди. Эндигина 32 ёшга қадам қўйган футболчилар яна камида 3-4 йил сифатли футбол намойиш этиши мумкин эди, бироқ...

Свен ва Ларс Бендерни кўплаб Бундеслига мухлислари яхши танишади десак, адашмаган бўламиз. Улар ортда қолган йилнинг сўнгида ўз фаолиятини якунлашга қарор қилди. Хўш, бунга нима сабаб бўлди?

Афсуски, эгизаклар сўнгги ойларда асосий таркибдан тушиб қолишни бошлади. «Аспиринлар» бош мураббийи - Петер Бош ҳимояда Едвай, Драгович, Жонатан Та ва Эдмон Тапсоба каби ҳимоячиларга ишоняпти ва ўз навбатида, улар қилиши керак бўлган ишни ортиғи билан бажармоқда. Марказда эса, Бош чаққонроқ футболчиларга имкон беришни афзал кўрди. Оқибатда, Бендерлар клуб учун кераксиз футболчига айланиб қолди.

Ларс Бошнинг 5-танловига айланди. Свен эса, ўнг қанот ҳимоясида тўп суришга мажбур қилинди. Афсуски, ўнг қанотда ҳам у Митчелл Вайзерга борган сари рақобатда мағлуб бўлаётган эди. Боз устига, Фосу-Менсанинг сафга қўшилгани ишни янада мушкуллаштириб юборди.

Бу эгизаклар бир неча йиллардан бери бирга тўп суриб келмоқда. Бир-бирига икки томчи сувдек ўхшаш йигитларнинг ҳаёт йўли ўзгача. Ларс «Мюнхен-1860» жамоасини «Байер»га ўзгартиради. Афсуски, у Леверкузен клуби сафида ҳеч қандай соврин ютишни уддалай олгани йўқ. Терма жамоа сафида эса, Европа чемпионатининг бронза медалига эга чиқди. "Рио Олимпиадаси"да кумуш медаль билан ортга қайтди.

Свен эса, эгизагидан клуб борасида озгина омадлироқ чиқди. У Дортмунднинг «Боруссия» клубини танлади ва жамоанинг сўнгги йиллардаги энг кучли даврида тўп сурди. Клопп даврида иккита чемпионлик ва Германия суперкубоги қўлга киритилди. Афсуски, Лёв Свен ва Ларснинг ўйин услубини у қадар ёқтирмас эди. Шу боис, 2014 йилдаги мундиал учрашувларини эгизаклар телевизор орқали кўришга мажбур бўлди. Ваҳоланки, Ларс Бразилияга йўл олган Крамердан бир бош устун футболчи эди. Унинг мундиалдан қолиб кетиши, кейинчалик ҳаётидаги энг катта армонга айланиб қолди.

2017 йилга келиб, Свеннинг Дортмунд клуби билан тузган шартномаси ўз якунига етди. «Байер» эса, уни эркин агент сифатида ўз таркибига қўшиб олди. Бу пайтга келиб, Свен аллақачон марказий ҳимоячига айланиб бўлган эди.

Тан олиш лозим, эгизакларнинг техникаси у қадар юқори эмас эди. Шунга қарамай, тартиб-интизом ва меҳнаткашлик бу камчиликни бир неча йиллар давомида беркитиб келди. Афсуски, замонавий футбол ҳужумкор футболчиларни олдинги планга чиқаришни бошлагач, улар чекинишга мажбур бўлишди.

Ачинарлиси шундаки, жароҳатлар Бендерларни бутун фаолияти давомида узлуксиз тақиб этиб юрди. Эгизаклар майдонда чинакамига жанг қилишга одатланган. Шу боис, улар олган жароҳатлар сони кишини ҳайрон қолдиради. Мия чайқалиши, бош суягининг дарс кетиши, елка суягининг синиши ва бел қисмидаги турли жароҳатлар уларни чинакам «жангчи» бўлганидан далолат. Тан олиш лозим, бундай касаллик варақасига эга бўлишни ММА ёки бокс вакиллари ҳам истамайди.

Ларс ўзининг сўнгги жароҳатини пандемиядан аввал орттириб олди. «Боруссия» Дортмундга қарши кечган баҳсда 3:3 натижаси қайд этилаёган эди. Қаҳрамонимиз жароҳат олган бўлса-да, Бошдан ўзини алмаштирмаслигини илтимос қилди. Кўп ўтмай, 4-голни киритди ва жамоасига ғалаба келтирди. Кейин яна иккита учрашувда майдонга тушган бўлса-да, шифокорлар уни жарроҳлик столига ётқизишди. Тизза суякларидаги муаммо футболчини бутун мавсумга ишдан чиқарган эди.

Бендерлар катта футболдан кетган бўлса-да, «Мюнхен-1860» жамоаси билан киберфутбол оламида «мўъжизалар» намойиш этмоқда. Сўнгги маълумотларга қараганда, улар видео ўйин орқали ўзлари севган клубни қўллаб-қувватлашни режалаштиришган. «BILD» нашри эса, тез орада Бендерларни яна катта футболга қайтишини ва «Мюнхен-1860» клуби сафида тўп суришини башорат қилмоқда. Айни дам, клуб 2-бундеслигага чиқиш учун кураш олиб бормоқда. Тажрибали Ларс ва Свеннинг келиши жамоа учун олдинга ташланган қадам бўлиши турган гап. Шу боис, клуб вакиллари Бендерлар билан музокараларга киришиш арафасида. Улар эса, ҳозирча, сукут сақламоқда.