Kannavaro qizil olgan Husanovni jazolaydimi?

2026 yilgi jahon chempionatining to‘rt ishtirokchisi – O‘zbekiston, Eron, Misr va Kabo-Verde terma jamoasi qatnashgan Birlashgan Arab Amirliklaridagi “Al-Ain Cup” xalqaro o‘rtoqlik turniri futbolchilarimiz g‘alabasi bilan yakunlandi.

Dastlab, Oston O‘runovning ikki goli evaziga Muhammad Saloh etakchiligidagi Misr terma jamoasini 2:0 hisobida mag‘lubiyatga uchratgan hamyurtlarimiz bosh sovrin uchun o‘tkazilgan finalda Eron futbolchilari bilan kuch sinashdi.

Hal qiluvchi bahsning kulminatsion nuqtasi 69-daqiqaga to‘g‘ri keldi. Abdulla Abdullaevning himoyadagi xatosini to‘g‘rilash uchun raqibga tashlangan Abduqodir Husanov raqibni yiqitdi. Uchrashuv hakami 21 yoshli himoyachiga to‘g‘ridan to‘g‘ri qizil kartochka ko‘rsatdi.

Eronlik charm to‘p ustalari 20 daqiqadan ortiq vaqt davomida bir kishi kam bo‘lib qolgan terma jamoamiz darvozasiga katta bosim uyushtirdi. Ammo Fabio Kannavaro shogirdlari mustahkam himoyalandi va darvoza daxlsizligini saqlab qoldi. Bir vaziyatda Abduvohid Ne’matov o‘ta murakkab zarbani qaytarib qolganini ham alohida ta’kidlash lozim.

Hisob ochilmagan uchrashuv g‘olibi penaltilar seriyasidan aniqladi. Futbol lotoreyasida yana Ne’matov mahorat ko‘rsatdi. 11 metrlik belgidan to‘p tepish bo‘yicha 4:3 hisobida zafar quchgan O‘zbekiston terma jamoasi “Al-Ain Cup” xalqaro musobaqasi bosh sovrini qo‘lga kiritdi.

Ayni paytda ushbu musobaqadagi o‘yinlar xorijiy ekspertlar tomonidan muhokama qilinmoqda. Xususan, rossiyalik mutaxassis Niklay Egorichev Abduqodir Husanovning qo‘pol o‘ynab, maydondan chetlatilganini xato sifatida ko‘rsatdi vabosh murabbiy Fabio Kannavaro sobiq himoyachi sifatida bu vaziyatni o‘yinchiga tahlil qilib berishini kutayotganini aytdi.

-  Abduqodir Husanov  Abdulla Abdullaevning xatosini to‘g‘rilashga uringan paytda to‘pga tashlanishi shart emasdi, aksincha, darvoza tomonga yugurishi kerak edi. Abduqodirning tezlik sifatini inobatga olgak, u raqibning birga bir chiqib ketishiga pozitsion tarzda to‘sqinlik qila olardi.

Bu masalada Kannavaro Husanovga nima deyishi qiziq. Fabio sobiq himoyachi sifatida bunaqa xatolarni individual tahlil qilib berishi lozim, - deb yozdi Nikolay Egorichev.

Sports.uz portali bu vaziyatdan keyin Abduqodir Husanovning o‘yinlari statistikasini ko‘rib chiqib, 21 yoshli futbolchimiz faoliyati davomida bungacha ikki marotaba maydondan chetlatilganini aniqladi.

Husanov faoliyatidagi ilk qizil kartochkani Belarus chempionatida “Energetik-Bgu” tarkibida o‘ynab yurganida olgan ekan. Oliy liga doirasida Minskning “Dinamo” jamoasiga qarshi o‘tkazilgan bahsda legionerimiz sakkiz daqiqa ichida ikki marotaba ogohlantirish olib, maydonni erta tark etishga majbur bo‘lgan.

Keyin Frantsiya chempionati vakili “Lans”ga ko‘chib o‘tgan himoyachimiz “Pari Sen-Jermen”ga qarshi uchrashuvda Usmon Dembelega ishlatgan qo‘polligi uchun to‘g‘ridan to‘g‘ri qizil kartochka bilan jazolagan edi.

Eron bilan bo‘lgan uchrashuvdagi qizil esa, Husanov uchun faoliyatidagi uchinchisi bo‘ldi. Eslatib o‘tamiz, Abduqodir 2023 yilning yozidan beri O‘zbekiston milliy terma jamoasi safida 24 marotaba maydonga tushgan va bitta qizil kartochkadan tashqari, hakam tomonidan to‘rt marotaba ogog‘lantirish olgan.

Shomurodov finaldan keyin nimalar dedi?

Husanovning ahvoli qanday? “Manchester Siti” o‘yinchilari reytingi e’lon qilindi

Shomurodovning transferi yanvarda hal bo‘ladi

O‘zbekistonning shov-shuvli g‘alabasiga qanday munosabat bo‘ldi?