Ботир Аҳмедов: "Ўзбекистон байроғини юқорига кўтарамиз. Катта ютуқларга оз қолди". Аҳмедов жаҳон чемпионлик жанги олдидан SPORTS.UZ сайти учун ўз фикрларини билдириб ўтди

  • 17 август, 2022, 11:10
  • 0
  • Бокс

Олдин хабар бериб ўтганимиздек, ўзбек боксчиси Ботир Аҳмедов (9-1, 8КО) 20 август куни Америка Қўшма Штатларининг Флорида штатида ташкил этиладиган бокс оқшомида супер енгил вазн тоифасида (63,5 кг) вакант қолган WBА жаҳон чемпионлик камари учун Доминикан вакили Алберто Пуэллога (20-0, 10 КО) қарши жанг олиб боради.

У мазкур тўқнашув олдидан сайтимиз муҳбири берган саволларга жавоб бериб ўтди.

- Ассалому алайкум. Мана чемпионлик жангингизга ҳам бир неча кун қолди. Тайёргарлик жараёни қандай кечди? Ортиқча жароҳат ёки кўнгилсиз воқеалар бўлмадими?

- Авваламбор, ассалому алайкум. Тайёргарлик аъло даражада бўлди. Машғулотларнинг биринчи босқичини Ўзбекистонда, қолаверса, Янгиобод базасида ўтказдим. У ерда асосан югуриш, тош кўтариш орқали жисмоний ҳолатга ишладик. Иккинчи босқични эса Америка Қўшма Штатларида олиб бордим. 3-4 спарринг рақиблар мени яхши формага киришим учун тоблашди. Ўйлайманки, жангга тўлиқ тайёрмиз. Ҳеч қандай жароҳатлар ёки кўнгилсиз воқеалар бўлмади. Мен ҳаётим давомидаги энг зўр тайёргарлик лагерини ўтказдим, десам ҳам бўлади.

photo_2022-08-17_11-07-54

- Сизга рақиблик қилувчи Пуэллонинг ҳам жангларини кузатган бўлсангиз, унинг қандай кучли томонларини айта оласиз?

- Тўғрисини айтсам, рақибларимни ҳеч ҳам кузатмайман ва кузатишни ҳам ёқтирмайман. Чунки ўзимнинг жанг режам ва услубим бор. Рингда ўз ишимни бажаришим керак. Рақиб нима қилар экан, уни қилайми, буни қилайми, деб ҳеч ҳам ўйламайман. Мен режам орқали ўз устимда ишлаб, ўзимни кучайтираман. Аммо жамоамиз ва мураббийларимиз рақибни ўрганиб, таҳлил қилишади ва менга шунга қараб кўрсатмалар беришади. Рақибнинг бўйи узун, чапақай. Шунинг учун, мен унга яқинроқ бориб, ўз услубимда босим билан жанг қилиб, Худо хоҳласа ғалаба қозонаман.

- Бу сафар ҳакамларга иш қолдирмайман, деган эдингиз. Нима деб ўйлайсиз, жангингиз таҳминан неча раунд давом этади?

- Ҳа, ҳозир ҳам ниятим шу, ҳакамларга иш қолдирмаслик. Чунки биринчи титул жангимда озгина ноҳақлик қилишган эди. Шунинг учун бу сафар ҳакамларга қолдиргим йўқ. Лекин рақибни шу (қайсидир) раундда йиқитаман деган ниятим йўқ ва нокаут қидириб юрмайман. Ўз жанг режам бўйича ҳаракат қиламан. Агарда бу режам ишласа, ўйлайманки, жанг узоққа чўзилмайди. 5-6 раундда ёки бўлмаса 8-9 раундда тугатаман. Худо хоҳласа 12 раундга қадар тугатишга ҳаракат қиламиз.

1171857061

- Яхши хабар эшитдик. Ўзбекистон номидан чиқишингиз ҳам расман тасдиқланибди. Аммо савол бироз бошқача. Қайси қўшиқ билан чиқиш борасида ҳам танлов қилдингизми?

- Ўзбекистон номидан чиқяпмиз. Ўзбекистонимизга қайтдик. Ажойиб ғалаба билан юртимизга қайтишни ният қилганман. 17 йил олдин ёш бола бўлиб кетган эдик. 17 йилдан кейин шундай катта ютуқ билан қайтсам, хурсанд бўламан. Қўшиқ бўйича ҳали бир қарорга келганим йўқ. Ўртоқларимиздан ҳам маслаҳат сўраяпман. Ишонаманки, барчага ёқадиган ажойиб қўшиқ танлаймиз.

- Кўпгина ўзбек бокс мухлислари сизни қўллаб қувватламоқда. Уларга айтар сўзингиз?

- Барча ўзбек мухлисларига қўллаб-қувватлаётганликларингиз учун катта раҳмат айтмоқчиман. Дуо қилиб туринглар. Худо хоҳласа, шу ютуқни қўлга киритиб, Ўзбекистон тарихига ўз номимизни ёзамиз. Ўзбекистон байроғини юқорига кўтарамиз. Барчаси яхши бўлади, деган умиддаман. Катта ютуқларга оз қолди.

Жалол Ахмедов суҳбатлашди.

Фикрлар

Фикр қолдириш учун авторизациядан ўтинг!