Ботирали Эргашев

Охирги пайтларда ўзидан илиқ таассурот қолдирган истеъдодли дарвозабон Ботирали Эргашев қисқа фурсатлар ичида мухлисларнинг меҳрини қозона олди. Айниқса, ўзининг тиришқоқлиги, меҳнатсеварлиги ҳамда ўзига бўлган ишончи туфайли ўз ўрнига эга бўлиб бормоқда. Ўтган мавсумнинг биринчи даврасида у «Динамо»нинг энг яхши футболчиси бўлганди. Лекин 25 ёшли посбон учун турли қийинчиликлар ҳам учраб турибди. Айниқса, ўтган йилги мавсум Эргашевнинг фаолиятида омадсиз тарзда таассурот қолдирди дейишимиз мумкин.

«Динамо»га тажриба етишмади

«Мавсум-2019»да «Динамо» жамоаси ўзидан икки хил таассурот қолдирди. Биринчи даврада сюрприз кўрсатган бўлса, иккинчи даврада бунинг акси кузатилди ва оқибатда клуб про-лигага равона бўлди. Ботирали Эргашев дастлаб жамоасининг муваффақиятсизлиги ҳақида тўхталиб ўтди.

- Менимча, жамоамизга тажриба етишмади. Биринчи даврада молиявий томондан вазият ёмон эмасди, аммо иккинчи даврада бу борада узилишлар бўлди. Асосийси эса «Динамо»да тажриба етарли даражада бўлмади. Эътибор берган бўлсангиз, кўплаб ўйинларимизда асосан маҳорат эвазига ютқазиб қўйдик. «Динамо» про-лигадан Суперлигага чиққан клуб эди ва таркибда ҳали элитада ўйнамаган футболчилар ҳам кўп эди. Бу ҳам ўз таъсирини кўрсатди деб ўйлайман.

«Бу йўлни босиб ўтмагунча тажриба тўплай олмасдим»

Эргашев «Динамо»нинг асосий дарвозабони эди. Лекин самарқандликлар Суперлига баҳсларида ўз дарвозасидан 47 бор тўп ўтказиб юбордилар. Табиийки, жамоанинг асосий посбони бўлган Ботирали учун бундай кўрсатгич салбий кўринишга эга. Ушбу масала бўйича гап кетар экан, посбон ҳам ўз муносабатини билдирди.

- Биласизми, футболчи ва хусусан дарвозабон бундай ҳолатларни кўриб, билмагунча шакллана олмайди. Бу йўлни босиб ўтмагунча дарвозабон тажриба тўплай олмайди. Ҳаёт доим бир текисда кетавермайди. Агар йилнинг бошида «Динамо» қийин аҳволга тушиб қолишини билганимда балки бошқача йўл тутган бўлишим мумкин эди. Яъни, олдиндан нима бўлишини ҳеч ким билмайди. Шунчаки, мен ҳам бундай йўлни босиб ўтишим керак экан. Энди кейинги фаолиятимда шундай хатоларни такрорламаслигим учун бундан ўзимга тегишли хулосаларни чиқариб олишим зарур. Бундан бу ёғига ҳаммасига тайёр бўлишим керак. Бу ҳам бир тажрибадир. Суперлигада эса энди иккинчи мавсумимни ўтказдим. Биринчи йил Наманганда «Навбаҳор» шарафини ҳимоя қилган бўлсам, бу йил «Динамо»да фаолият олиб бордим. Лекин ҳали 100 фоизлик тўлиқ мавсумларни ўтказганим йўқ. «Навбаҳор»да 14 та, «Динамо»да эса 22 та учрашувда иштирок этдим. Масалан, Элдор Суюнов, Санжар Қувватов каби дарвозабонлар кўп йиллардан бери элитада ўйнаб келишаётгани боис уларда тажриба катта. Барибир футболда тажриба ўз сўзини айтади.

Ботирали Эргашев

«Навбаҳор» фаолиятимда катта трамплин бўлди»

Эътибор берган бўлсангиз, Ботирали «Навбаҳор»даги иштирокини ҳам эслаб ўтди. Дарҳақиқат, унинг 2018 йили Намангандаги фаолиятини кўпчилик яхши эсласа керак. У «Навбаҳор»да кашфиётлардан бирига айлана олганди. Кўплаб учрашувларда Эргашев ўйин қаҳрамонига ҳам айланганди. Қолаверса, ўша пайтда Ботирали Суперлигада ростакамига дебютини ҳам ўтказганди.

- Келинг, ҳаммасини бошидан бошлайлик, эсингизда бўлса, «Навбаҳор»дан олдин «Пахтакор»нинг ёшлар жамоасида ўйнаб юрардим, - дея мавзуни давом эттирди, Эргашев. - Фақат икки марта «Пахтакор»нинг асосий таркибида ўйнаганман. 2016 ва 2017 йилги мавсумларда биттадан учрашувда майдонга тушганман. Суперлигада барқарор равишдаги ўйинни «Навбаҳор»да бошлаганман. Ўшанда биз Ўзбекистон олимпия терма жамоаси билан Хитойдаги Осиё чемпионатида ғолиб бўлиб қайтгандик. Ўшанда ўзимга бўлган ишонч ортиб кетганди. Инсон ўз соҳаси бўйича рельсга тушиб олгунча турли қийинчиликларни босиб ўтади. «Навбаҳор»даги фаолиятим эса мен учун катта трамплин бўлди. Осиё чемпиони бўлиб қайтганимиздан сўнг вилоят ҳокими Ҳайрулла Ҳайитбоевич Бозоров Одил Ҳамробеков билан иккаламизни чемпионлик билан табриклаган ҳолда қутлаганди. Ўшанда «Навбаҳор» жамоасида ўйнашни истайсанми деганида бунга қаршилигим йўқ деб айтгандим. Чунки менга ўйин амалиёти керак эди. «Пахтакор» билан гаплашганимда улар менинг кетишимга қаршилик билдиришмади ва ижара эвазига Наманганга келдим.

 «Аслида «Пахтакор» мени «Динамо»га қўйиб юборишни истамаганди»

Шундан сўнг Ботирали Эргашевнинг фаолиятида яна ўзгариш кузатилди. Гарчи у «Пахтакор»га тегишли бўлса-да, у ердаги кучли рақобат туфайли жамоанинг асосий таркибига кириши даргумон эди. Шу боис унга ўйин амалиёти зарур бўлгани боис бошқа клубда фаолиятини давом эттириши ўзи учун ҳам маъқул йўл ҳисобланарди. Шундай қилиб, дарвозабон ўтган йили «Динамо»га кўчиб ўтди. Ўз навбатида посбон самарқандликлар таркибига қўшилиши осон юз бермагани ҳақида ҳам айтиб ўтди.

- 2018 йилнинг охирида ижара шартномам тугаганидан сўнг мени «Пахтакор» қайтариб олди. 2019 йилги мавсум бошланишига икки кун қолганида эса «Пахтакор» мени «Динамо»га беришга рози бўлди. Унгача эса мени учинчи дарвозабон сифатида олиб қолишмоқчи бўлишганди.  Чунки ҳуқуқим ўзимда эмас, «Пахтакор»да эди. Аммо улар сенга ишоняпмиз, биз билан қоласан дейишганди, лекин охир-оқибат «Динамо»га кетдим. Лекин барчаси осонликча юз бермаган. «Пахтакор» билан бирга Осиё Чемпионлар лигаси доирасида Эронга «Персеполис»га қарши ўйин учун кетдик ва у ердан қайтиб келдик. Бир ҳафта олдин эса менга самарқандликлар томонидан таклиф бўлганди. Ўша пайтда олдимда иккита таклиф бўлиб, «Динамо» билан «Қўқон-1912» вариантлари бор эди. «Персеполис» билан ўйнаб қайтганимиздан сўнг кейинги тақдирим ҳақида сўраганимда «бўлди, сен «Пахтакор»да қоласан» деб айтишди. Кейин эса «йўқ, кетасан экан» дейишди. Хуллас, шу тариқа иккиланиб ҳам қолгандим. «Динамо» 8 март куни ўз уйида «Насаф» билан ўйнаши керак эди ва мен 6 март куни «Динамо»га қўшилдим. Ўшанда «Пахтакор» билан «Динамо» якунда келишиб олишганди. Самарқандда мослашиш жараёни ва футболчилар билан тил топишиш ҳам яхши кечганди. Биринчи даврада ўйинлар пайтида хато қилардик-да, лекин тезда ўша хатоимизни тўғрилардик. Ўйинчилар бир-бирига ёрдам бергани сабабли хатолар у қадар кўзга ташланмасди. Бироқ оддий вазиятларда хатога йўл қўйиб гол ўтказган ва бунинг оқибатида ютқазган пайтларимиз ҳам бўлган. Лекин «Динамо»га ўтиб афсусланишга ҳожат йўқ эди. Чунки мен у ерда ўзим учун катта дарс олдим. Инсон хатолари туфайли тобланади ва тажриба тўплайди. Бирор нимага осонликча эришиб бўлмайди. Ҳамма нарсанинг ўзига яраша қийинчилиги бўлади. Ҳаммасига сабр қилиш керак.

Ботирали Эргашев2

«Динамо» раҳбариятига менинг масаламни тезроқ ҳал қилишларини  тушунтиряпман»

Ботирали Эргашев янги мавсумни қаерда ўтказади? Бу савол ҳозирги кунда ўзи учун энг муҳими ҳисобланса ҳам керак. Ҳозиргача ушбу дарвозабоннинг бирор-бир клубнинг машғулотларида иштирок этаётгани борасида хабарлар мавжуд эмас.

- Яширишнинг ҳожати йўқ, менга тўртта клуб қизиқаётганди. Ҳаммаси эса қандай келишишга боғлиқ. АГМК, «Бунёдкор», «Қўқон-1912» ва «Навбаҳор» жамоаларидан таклифлар бўлди. Мавсум бошланишига бир ярим ой вақт қоляпти. Клублар борган сари таркибларини тўлдириб боришяпти. Бу борада «Динамо» раҳбариятига менинг масаламни тезроқ ҳал қилиш кераклигини тушунтирдим. Вариантлар тугаган сари эса мен про-лигада қолишга мажбур бўлиб қоламан. «Динамо» билан яна бир ярим йил шартномам бор. Менимча, менга қизиқаётган клублар орасида АГМК билан «Навбаҳор» вариантлари бекор бўлди. Чунки улар ўз посбонларини сақлаб қолишди. Адашмасам, олдимда энди иккита таклиф қолди. Ўзимда ҳам Суперлигада иштирок этиш ниятим бор. Шу боис «Динамо» раҳбарияти билан жиддий гаплашяпман. Суперлигада ўйнашим зарурлигини айтяпман. Агар келиша олишса ижара ҳисобида ёки бўлмаса трансферимни сотиб олиш йўли билан кетишим мумкин.

«Менга қизиққан клуб трансферимни келишиб олиши керак»

Ҳозирча Эргашевнинг масаласи очиқ турибди. Юқорида ўзи айтганидек, футболчининг «Динамо» билан амалдаги шартномаси бор. Ўзи эса про-лигада эмас, Суперлигада иштирок этишни хоҳламоқда. Шу нуқтаи назардан олиб қараганда, Ботирали имкони қадар тезроқ янги клубига эга бўлишни истамоқда. Аммо бунинг учун харидор бўлган жамоа «Динамо» билан келишиши ҳам муҳим масала бўлиб турибди.

- Клуб раҳбарлари ҳам ҳар хил вариантларни айтишяпти. Баъзида қолишимни хоҳлашяпти, баъзида мени сотиш ҳақида ўйлашяпти. Ўзим ҳам тушунмай турибман. Чемпионат бошланишига тобора оз фурсат қоляпти. «Динамо» мен билан яна бир футболчини «Пахтакор»дан бир миллиард сўмга сотиб олишган. Мен билан қизиқаётган клуб трансферимни сотиб олиш учун ўша пулнинг ярмини тўлаши ёки бўлмаса ижара пулини бериши керак бўлади. Ҳаммаси иккала томоннинг қандай келишувига боғлиқ. Ўзим эса тезроқ ҳаммаси ҳал этилишини истаяпман. Чунки янги мавсумга тайёргарлик кўришим лозим. Ниятларим эса катта, - дея фикр билдирди, дарвозабон.

 

Фикрлар

Фикр қолдириш учун авторизациядан ўтинг!
&
Surxon turon
15/01/2020 13:45
Металуркди ӯрнига динама қолса бӯларди бижлдоқ лигалада ахир бизда мумкунку хамма нарсага