Бруну Фернандеш Рой Киннинг танқидигага жавоб бериб, шахсан телефон орқали сўраб олмоқчи

"Манчестер Юнайтед" ярим ҳимоячиси Бруну Фернандеш клуб афсонаси Рой Киннинг танқидларига муносабат билдирди.

Аввалроқ португалиялик футболчи АПЛдаги голли узатмалар бўйича рекордни такрорлаганидан кейин, Рой Кин унинг сўзларини нотўғри талқин қилиб, жамоадан кўра шахсий рекордлар ҳақида кўпроқ ўйлаётганликда айблаган эди.

Кейинроқ Фернандеш яна бир ассист амалга ошириб, ушбу рекорднинг ягона эгасига айланди.

“Мен Рой Кинни клуб учун қилган барча ишлари учун ҳар доим ҳурмат қилганман. Техника ёки етакчилик хусусиятларим ҳақидаги танқидни қабул қилиш мумкин. Гарчи тарихий рекорд ўрнатганим учун мақтов эшитишни афзал кўрган бўлардим.

Аммо мен ҳеч қачон айтмаган сўзларни менга нисбат беришни мутлақо қабул қилмайман. Бу энди чегарадан ошиб кетади”, — деди Фернандеш "The Diary of a CEO" подкастида.

“Мен ҳеч қачон шахсий совринлар ёки рекордлар ортидан қуваман деб айтмаганман. Менинг ягона мақсадим — шу футболкада совринлар ютиш”, — дея қўшимча қилди португалиялик футболчи.

Шунингдек, Фернандеш Уле Гуннар Сульшердан Рой Киннинг телефон рақамини сўраганини ва у билан шахсан гаплашмоқчилигини ҳам айтди.