Brunu Fernandesh Saudiya klublaridan bosh tortdi

"Manchester Yunayted" sardori Brunu Fernandesh kamida bir mavsum Evropada qoladi. "TalkSPORT" nashrining xabariga ko‘ra, u yozda Saudiya klublaridan kelgan uchta taklifni rad etdi.

"Al-Hilol" xavbekni Klublar o‘rtasidagi Jahon chempionatigacha olib kelishga harakat qildi, agent Migel Pinyu esa bir hafta Saudiya Arabistonida muzokaralarda qatnashdi. Fernandesh avvaliga qiziqish bildirgan, ammo oilasi bilan suhbatdan so‘ng MYuda kamida yana bir mavsum qolishga qaror qilgan.

Ma’lumotlarga ko‘ra, "Al-Hilol" futbolchi uchun 80 million funtdan ortiq mablag‘ to‘lashga tayyor bo‘lgan. Shunga qaramay, xavbek shartnomasida 60 million funtlik kompensatsiya mavjudligi haqidagi xabarlar rad etildi.

Manbaga ko‘ra, Brunu Jahon chempionati yilida Evropada qolishni ma’qul ko‘rgan. Shu bilan birga, u 2026 yil yozida Saudiyaga yo‘l olishi mumkinligini ham istisno etmagan.

Portugaliyalikka Krishtianu Ronaldu jamoasi "An-Nasr" ham qiziqish bildirgan. Ronaldu iyul oxirida shaxsan so‘rov yo‘llagan, ammo Fernandesh uning o‘ziga Evropada qolish niyati borligini aytgan.

Yana bir klub – "Al-Ittihod" ham futbolchiga qiziqqan, ammo Karim Benzema jamoasida legionerlar limiti tugagani uchun muzokaralarni davom ettirish imkoni bo‘lmagan.