Бу жамоага Неймар керакмас!

“Манчестер Юнайтед”нинг собиқ сардори Гари Невилл айни пайтда футбол эксперти сифатида фаолият юритмоқда.

Бу мутахассис “Ньюкасл”нинг ПСЖ ҳужумчиси Неймарни трансфер қилишга уринаётганига ўз муносабатини билдирди.

- Неймар – ажойиб ўйинчи. Лекин мен “Ньюкасл” бош мураббийи Эдди Хау уни олиб келиши билан жамоада цирк бошланишига дуч келишидан огоҳлантириб қўймоқчиман. Ҳозир бу клубга ёрдам бермайди. “Ньюкасл” қайта қуриш жараёнида, мустаҳкам фундамент қўйиб бўлинган, - деди Гари Невилл Chronicle Live нашрига.

Саудия Арабистони инвесторлари қўлига ўтганидан кейин “Ньюкасл” бир неча муҳим трансферларни амалга оширди. Жамоа қисқа фурсатда аутсайдерлар қаторидан чиқиб, ҳозир Премьер-лигада учинчи ўринда бормоқда.