Бу клуб Родрининг "Реал"га ўтишига йўл қўймоқчи эмас

Испаниянинг нуфузли Cadena Ser нашри хабар беришича, "Барселона" раҳбарияти Родрининг келажаги бўйича курашга қўшилишга тайёр. 

Бу фақат битта шартга боғлиқ: футболчининг ўзи жамоасини алмаштиришга қарор қилиши ва эҳтимолий келишув молиявий жиҳатдан амалга ошириш мумкин бўлган ҳолда бўлиши керак.

Аввалроқ мадридлик "Реал" ҳам Родрига жиддий қизиқиш билдиргани маълум қилинган эди. Бироқ "қироллик клуби" янги трансферни расмийлаштириш учун аввал жамоа рўйхатидан бир ўйинчига йўл беришга мажбур.

Испания терма жамоаси ярим ҳимоячиси Родрининг "Манчестер Сити" билан амалдаги шартномаси 2027 йил ёзигача мўлжалланган. У ўтган мавсумда барча мусобақалар доирасида 33 та ўйин ўтказиб, 2 та гол урди.