Бу юлдуз жамоамга яқинлашмасин!

Англия Премьер-лигасида жон сақлаб қолиш учун курашаётган “Вест Хэм” жамоаси бош мураббийи Нуну Эшпириту Санту машҳур англиялик футболчи Жесси Лингарднинг клубга қайтишига тўсқинлик қилди.

Ўз даврида Англия Премьер-лигасининг энг ёрқин юлдузларидан бўлган Лингард декабрь ойида Жанубий Кореянинг “Сеул” клубини тарк этганидан бери ўзига янги жамоа қидирмоқда.

Қишки трансферлар ойнасининг охирги кунларида Жессининг агентлари ўз мижозлари хизматини Премьер-лиганинг бир неча клубларига, жумладан “Вест Хэм”га ҳам таклиф қилган эди.

Лингар 2020-2021 йилги мавсумнинг иккинчи ярмида ижара асосида “Манчестер Юнайтед”дан “Вест Хэм”га ўтиб, бу жамоада юқори даражада ўйнаган эди. Ўшанда ҳужумкор футболчи 16 та учрашувда 9 та гол ва олтита ассист муаллифи бўлган.

Talksport нашри маълумотига кўра, Лингарднинг ўзи ҳам “Вест Хэм”га қайтишдан манфаатдор бўлган, бироқ бош мураббий Нуну Эшпириту Сантуш 33 ёшли англиялик ўйинчини жамоага қўшишдан бош тортди.

“Вест Хэм” ҳужумкор футболчи позициясига “Вулверхэмптон”да Нуну Санту қўл остида ўйнаган Адама Траорени “Фулхэм”дан 2 миллион фунтга сотиб олишни афзал кўрди.