Буффон: "У керак бўлса, Туриннинг Марадонасига айланади"

"Парма" дарвозабони Жанлуижи Буффон "Ювентус"га кўчиб ўтиши кутилаётган Анхель Ди Мария ҳақида ўз фикрларини билдириб ўтди. Унинг айтишича, Ди Мария Марадонанинг даражасига чиқиши ҳам мумкин.

"Футболчиларга улар ўйнаган жойидан келиб чиқиб баҳо бериш керак. Бугун А Серия техникали футболчилар жиҳатидан анча заиф. Анхель эса ақлбовар қилмас техник қобилиятга эга. 

У рақиб дарвозаси олдида ўта хавфли. Дриблинги орқали ҳимоячилардан осон ўтиб кета олади. Ди Мариянинг универсаллиги ҳам ўзи учун катта ютуқ. 

Мен 44 ёшдаман. Бироқ ҳамон ўйнашда давом этмоқдаман. Ёш муҳим эмас, муҳими, мотивация ва иштиёқ. Агар Ди Мария "Ювентус"га ўтса, икки томон учун ҳам бу фойдали бўлади.

У керак бўлса, Туриннинг Марадонасига айланади. Такрор айтаман, А Серия учун у Марадона каби бўла олади", - деди италиялик афсонавий посбон.