Бугун ЕЧЛнинг навбатдаги ярим финалчилари номи аниқланади!

Хабарингиз бор, кеча тунда Европа Чемпионлар Лигаси чорак финали жавоб учрашувларига старт берилган эди. Парижда бўлиб ўтган ПСЖ - "Бавария" баҳсида Левандовскисиз қолган немислар Шупо-Мотингнинг ягона голи эвазига ғалабани қўлга киритишди. Бироқ меҳмондаги голлар ҳисобига парижликлар кейинги босқич йўлланмасига эга чиқди.

Пандемия сабабли Севильяда ўтказилган "Челси" - "Порту" учрашувида эса ярим финалчи номи 1-ўйиннинг ўзида деярли ҳал бўлиб улгурган эди. Ўйин "Порту" аъзоси Мехди Таремининг сўнгги дақиқаларда урган суперголи билан якунланди. 2 учрашув бўйича умумий ҳисоб эса - 2:1. "Челси" - ярим финалда!

Бугун чорак финалнинг яна иккита жавоб баҳси ўтказилади. Дортмунддаги "Сигнал Идуна Парк" стадионида "Боруссия" "Манчестер Сити"ни қабул қилса, "Энфилд"да "Реал" Мадрид "Ливерпуль" меҳмони бўлади. Иккала учрашувда ҳам интрига сақланиб қолган, кичик устунлик "Сити" ҳамда "Реал"да (2:1; 3:1). Бироқ "Боруссия" ҳам, "Ливерпуль" ҳам меҳмонда гол уришга муваффақ бўлган, бу уларга бугун асқотиши мумкин.

00:00 дан бошлаб ФутболТВ ҳамда УзрепортТВ телеканалларида ушбу учрашувларни томоша қилишингиз мумкин. Мароқли томоша тилаймиз!