Бугун Париж-2024 га чипталар сотуви бошланади. Уни қандай сотиб олиш мумкин?

Бугун 2024 йил спорт оламида рўй берадиган энг муҳим воқелик – Париж-2024 Олимпия ўйинларига чипталар сотуви учун дастлабки жараён бошланади. Ташкилий қўмита шартларига кўра, чипталарни харид қилиш пакетбай ёки донабай шаклда онлайн тарзда 3 босқичда амалга оширилади. Ушбу мақолада мухлислар бўлажак Олимпиадага чипталарни қандай сотиб олишлари мумкинлиги ҳақида тўхталиб ўтамиз:

Чипталарни қандай харид қилиш мумкин?

Ҳар бир давлатнинг (Халқаро Олимпия қўмитасига аъзо бўлган) кенг жамоатчилик вакиллари ўз жойларидан туриб ташкилий қўмита сайти орқали чипталарни харид қилишлари мумкин. Ташкилий қўмита чипталарни сотиш бўйича ишлаб чиққан стратегияга кўра, мухлислар харидни онлайн навбат орқали қуръа йўли билан амалга оширишлари мумкин.

Бу қандай амалга оширилади?

Бугундан ташкилий қўмитанинг чипталар сотуви учун ишлаб чиққан платформаси иш бошлади. Чипталарни пакетбай кўринишда сотиб олиш истагида бўлган мухлислар қуйидаги 3 босқичдан ўтишлари лозим бўлади:

1. 2022 йилнинг 1 декабридан то 2023 йилнинг 31 январь кунига қадар https://tickets.paris2024.org/ сайти орқали рўйхатдан ўтиш;
2. 2023 йилнинг 31 январь санасида рўйхатдан ўтиш якунланади ва ариза ташлаганларнинг тўлиқ таркиби шакллантирилади;
3. 2023 йилнинг 15 февраль куни рўйхатга олинган барча иштирокчилар учун қуръа ташлаш маросими бўлиб ўтади. “Make Your Games” (“Ўз Ўйинингни ярат”) шиори остида ташкил этиладиган қуръа ғолибларининг электрон почтасига бу ҳақида хат келади. Ғолиблар учун чипталар сотуви бошланади. Бунда яна бир муҳим шарт борки, қуръада танланган иштирокчилар 48 соат ичида электрон почталарига юбориладиган ҳаволага кириб, хат қабул қилинганини тасдиқлашлари лозим. Бу мусобақага пакетбай тарзида чипта олишни истаганлар учун механизм. Донабай чипта харид қиладиган мухлислар учун жараён қуйидаги тартибда ўтади:

1. 2023 йилнинг 1 март кунидан апрель ойининг охирига қадар қуръа учун рўйхатдан ўтиш;
2. 2023 йилнинг май ойи бошида: қуръа иштирокчиларини рўйхатга олиш;
3. 2023 йилнинг май ойи давомида: донабай чипталар хариди.

Пакетбай тарзида ўйналадиган чипталар нархи 72, донабайлари эса 24 евродан бошланади. Батафсил маълумлотни https://tickets.paris2024.org/ сайти орқали олишингиз мумкин.

Манба: olympic.uz

Фикрлар

Фикр қолдириш учун авторизациядан ўтинг!