Бунақа пулга ўйнаса арзийди! Муҳаммад Салоҳ "Трабзонспор"дан қанча маош олиши маълум бўлди

Миср юлдузининг маоши Туркия фонд биржасига очиқланди. У ўз номи остида сотиладиган маҳсулотлардан ҳам 20 фоиз улуш олади.

Миср терма жамоаси ҳужумчиси Мухаммад Салоҳ «Трабзонспор» билан икки йиллик шартнома имзолади. Туркия клуби маълумотига кўра, у ҳар мавсум учун 17 миллион евро (тақрибан 14,5 миллион фунт) маош олади.

Расмий эълон «Трабзонспор» мухлислари клубнинг Қора денгизнинг шарқий соҳилида жойлашган шаҳардаги стадионига йўл олаётган, «Ливерпуль»нинг  34 ёшли собиқ футболчисини тақдим этиш маросимига тайёргарлик кўраётган бир пайтга тўғри келди. Салоҳ бир кун аввал жамоа формасида кулимсираб Истанбулга етиб келган эди.

Клубнинг Туркия фонд биржасига йўллаган баёнотида қайд этилишича, Салоҳ ўз номи билан сотиладиган барча маҳсулотлардан 20 фоиз улуш олади. Шунингдек, ҳар мавсум шартномада кўзда тутилган қўшимча мукофотлар ҳам белгиланган. Бироқ бу мукофотлар миқдори ва улар қайси кўрсаткичларга боғлиқ экани очиқланмаган.

Салоҳ ёзги трансфер ойнасидан олдин, тўққиз йил давомида тўп сурган «Ливерпуль»ни тарк этди. У инглиз клуби сафида 442 ўйинда майдонга тушиб, 257 та гол урди, икки бор Англия премьер-лигаси ва бир марта Чемпионлар лигасида ғолиб чиқди. Ўтган мавсумда унинг самарадорлиги пасайди, айрим Европа учрашувларида захирада қолдирилди, бу эса ўшандаги бош мураббий Арне Слот билан очиқ можарога сабаб бўлди.

«Трабзонспор» одатда Туркияда Истанбулнинг «Фенербаҳче», «Галатасарой» ва «Бешиктош» клубларидан кейин тўртинчи катта жамоа сифатида тилга олинади. Жамоа ўтган мавсум Суперлигада учинчи ўринни эгаллаб, Европа лигаси саралаш босқичида иштирок этиш ҳуқуқини қўлга киритган.

Клубнинг сўнгги маҳаллий чемпионлик соврини 2021–2022 йилги мавсумда қўлга киритилган эди.