Бунақаси юз йилда бир бўлади: Испания терма жамоаси ғалати ишга қўл урди

УЕФА Миллатлар лигасининг тўртинчи турида Испания терма жамоаси сербиялик футболчилар устидан 3:0 ҳисобида зафар қучди.

Европанинг амалдаги чемпиони томонидан киритилган голларга Эмерик Ляпорт, Альваро Мората ва Алекс Баэна муаллифлик қилди.

Бу ўйинда қизиқ ҳолат кузатилди. Терма жамоа бош мураббийи Луис де ла Фуэнте бошланғич таркибга испан футболи грандлари – “Реал”, “Барса” ва “Атлетико”да бирорта футболчини киритмади.

Манбаларнинг таъкидлашича, бундай ҳолат Испания миллий терма жамоасининг 114 йиллик тарихида сўнгги бор 96 йил аввал кузатилган экан. 1928 йилги Олимпия ўйинларида Испания терма жамоаси шарафини фақатгина бакс миллатига мансуб футболчилар ҳимоя қилган, Мадрид ва Каталония грандларидан ўйинчи олинмаган.

Сербияга қарши баҳсда  мураббийлар штаби бошланғич таркибда Давид Райя (“Арсенал”), Педро Порро (“Тоттенхэм”), Дани Вивиан (“Атлетик”), Эмерик Лапорт (“Ан-Наср”), Марк Кукурелья (“Челси”), Микель Мерино (“Арсенал”), Фабиан Руис (ПСЖ), Мартин Субименди (“Реал Сосьедад”), Микель Оярсабаль (“Реал Сосьедад”), Алекс Баэна (“Вильярреал”), Альваро Мората (“Милан”) каби ўйинчиларни илк дақиқадан ўйнатди.

Учрашув давомида “Барселона”нинг икки вакили Педри ва Пау Кубарси захирадан ўйинга қўшилди.