Бундеслига ўйинчиси ўн икки йилдан кейин гол урди. Лекин бу рекорд эмас

Германия чемпионатида 28-турида “Хайденхайм” футболчилари меҳмонда Мёнхенгладбахнинг “Боруссия” жамоасига қарши майдонга тушиб, учрашувда 2:2 ҳисобида дуранг ўйнади.

“Хайденхайм”нинг иккинчи голини иккинчи бўлим ўртасида Марнон Буш урди ва бу тарихий натижа сифатида қайд этилди. Гап шундаки, Марнон Буш Бундеслигада жуда узоқ вақт — 2014 йилнинг сентябридан бери гол ура олмаётган эди.

Буш Германия чемпионати юқори дивизионида охирги голини урганидан бери жами 4207 кун ўтди. Лекин бу ҳали рекорд эмас.

Бундеслига тарихида фақат битта ўйинчи икки гол орасида бундан ҳам узоқ танаффус қилган. Гап Бернд Шустер ҳақида кетмоқда, у учун бу танаффус 4875 кунни ташкил этган.