Бутсани костюмга алмаштирганлар

Футболчи бутсасини михга илгач, ўзини мураббийликда синаб кўриши одатий ҳолатга айланган. Шундай бўлса-да, барча собиқ футболчилар ҳам яхши мураббийга айлана олмайди. Бу ишни уддалаганларни эса, ўз клуби жамоада олиб қолиш учун қўлидан келган барча ишни амалга оширади. Яқинда, Маурисио Почеттино Зидан сингари ўзи тўп сурган клубига қайтди ва жамоани мураббий сифатида бошқарувини қўлга олди. Хўш, яна қайси мураббийлар ўз клубининг фидойисига айланиб бормоқда? Сезганингиздек, бугун футболчилик даврида тўп сурган клубларида мураббийлик карьерасини олиб бораётганлар ҳақида сўз боради.

Диего Симеоне

Футболчилик даври: 1994-1996, 2003-2005

Мураббийлик даври: 2012 йилдан бери.

Диего учун «Атлетико» янги стадион олдида каттагина ҳайкал ўрнатган. Янги асрдаги «Атлетико»нинг барча ғалабалари замирида аргентиналик мураббийнинг меҳнатлари мавжуд. Қаҳрамонимиз футболчилик даврида жамоа сафида 155 та ўйин ўтказган ва 3 та совринга эга чиққан. У киритган голлар сони 29 та.

Симеоне мураббий сифатида жамоага қайтгач, нақд 9 та совринни боши узра кўтаришга муваффақ бўлди. Афсуски, у икки бор ЕЧЛ финалини бой берди. Шунга қарамай, Ла Лигадаги ғалаба унинг буюк мураббийлардан бири эканлигини англатади.

Ханс Дитер Флик

Футболчилик даври: 1985-1990

Мураббийлик даври: 2019 йилдан бери

Ханс футболчилик даврида ҳам камтарин эди. Маттеус ва Бремелар билан биргаликда «Бавария»нинг ярим ҳимоясида тўп сурган футболчи клуб сафида 149 та ўйинда майдонга тушган. Тўғри, голлари сони атиги 7 та, бироқ у Мюнхен клуби билан 6 та совринни боши узра кўтаришни уддалаган.

Мураббий сифатида эса, унинг ишлари чакки эмас. Эндигина 2 йил ўтган бўлса-да, Флик нақд 5 та совринга эга чиқди. Бу тажрибасиз мураббий учун ажойиб кўрсаткич!

Рональд Куман

Футболчилик даври:1989-1995 йиллар

Мураббийлик даври: 2020 йилдан бери

Рональд футболчилик даврида «Барселона»нинг энг зўр даврини бошидан ўтказган. Ҳимоячи бўлишига қарамай, голланд Каталония клуби сафида 83 та гол киритишга муваффақ бўлгани сўзимизга исбот бўла олади. Унинг 1991/92 йилги мавсум Европа Чемпионлар кубоги финалида урган голи «Барселона» учун янги тарих яралишига сабаб бўлган эди. Айнан унинг зарбасидан сўнг, «Барса» ўз тарихида илк бор Европада тенгсиз жамоа номини қўлга киритган эди.

Афсуски, қаҳрамонимиз мураббий сифатида «Барселона»нинг энг оғир кунларида ташриф буюрди. Жамоа ўзи учун янги президент сайлаш арафасида. Мессининг кетиши ёки қолиши сўроқ остида. Клубнинг қарзлари бир миллиардга яқинлашиб қолди. Таркибда фойдасиз қиммат футболчилар йиғилган. Умуман олганда, Рональд Куманинг қилиши лозим бўлган ишлар талайгина.

Андре Пирло

Футболчилик даври: 2011-2015 йиллар

Мураббийлик даври:2020 йилдан бери

Аслида, Пирло ўзининг энг зўр йилларини «Милан» жамоасига бағишлаган эди. 32 ёшга тўлгач, клуб Пирло билан шартномани узайтиришни истамади. Оқибатда, Андреа «Ювентус»га йўл олди. 4 мавсум давомида супер ўйин намойиш этди ва 4 бор чемпионликни нишонлади. Футболчилик фаолиятини тугатгач, кўп ўтмай унга Турин клуби бош мураббийлиги ишониб топширилди. Ҳозирча, у бу ишни қойилмақом уддаламоқда, деб бўлмайди. Қаҳрамонимиз бошчилигида «Юве» ўртамиёна тўп сурмоқда. Мутахассисларнинг фикрича, бу вақтинчалик ҳолат. Тез орада, Пирло ўзи истаган «Ювентус»ни шакллантиради.

Фрэнк Лэмпард

Футболчилик даври:2001-2014 йиллар

Мураббийлик даври: 2019 йилдан бери

Фрэнкнинг «Дерби» билан кўрсатган кичик «мўъжиза»сидан сўнг, Лондонга таклиф этилди. Лэмпард трансфер таъқиқига қарамай, «Челси»ни кучли тўртликка олиб киришни уддалади. Жамоанинг келажаги порлоқ эканлиги ҳақида ҳамма тинмай сўзлади. 2020 йилда эса, «аристократлар» трансферлар учун 250 миллион евро сарфлади. Янги футболчиларнинг келиши Лэмпардни супер мураббийга айлантириши кутилган эди, бироқ бу иш амалга ошмади. Фрэнк ҳаммасини бошидан бошлади. Унинг йигитлари ҳали тўлиқ механизм сифатида шакллангани йўқ.

Қаҳрамонимиз «Челси» клубида футболчи сифатида жуда катта ҳурматга сазовор бўлган. Клуб тарихидаги энг яхши тўпурар бўлибгина қолмай, Фрэнк нақд 13 та соврин ютишга муваффақ бўлган. Улар орасида Европа Чемпионлар Лигасининг борлиги, Лэмпарднинг буюк футболчилардан бири эканлигидан далолат.

Симоне Инзаги

Футболчилик даври:1999-2010(196 та ўйин 55 та гол, 8 та соврин)

Мураббийлик даври: 2016 йилдан бери

Инзаги футболчи сифатида «Лацио»нинг энг гуллаган даврларида тўп сурган. Италия чемпионлигини қўлга киритган. Афсуски, сурункали жароҳатлар тўлиқ имкониятларни намойиш этишга тўсқинлик қилиб қолди.

Мураббий сифатида эса, Симеоне аллақачон 3 та совринни боши узра кўтаришга муваффақ бўлди. Бу ҳозирча, бошланиши. Италиялик мухлислар бир кун келиб терма жамоа постида Инзагини кўришдан умидвор.

Микель Артета

Футболчилик даври:2011-2016 йиллар (150 та ўйин 16 та гол, 4 та соврин)

Мураббийлик даври: 2019 йилдан бери

Артета футболчилик фаолиятининг сўнгги мавсумларини Лондон клубида ўтказди. Шунга қарамай, мураббийлик карьерасини «Манчестер Сити»да бошлади. Пеп Гвардиоланинг ёрдамчиси сифатида фаолият олиб борган Артета 2019 йилда «Арсенал» устози этиб тайинланди.

Айни дамда, Лондон клубининг АПЛдаги аҳволи бироз оғир, лекин мухлислар Микелдан миннатдор. Сабаби, айнан у ўзининг қисқа муддатли фаолияти давомида клуб учун 2 та соврин ютиб беришни уддалади.

Сержиу Консейсау

Футболчилик даври:1996-1998,2004 йиллар (89 та ўйин 15 та гол, 5 та соврин)

Мураббийлик даври: 2017 йилдан бери

Сержиу Италия чемпионатига йўл олишидан аввал ва қайтиб келган «аждарлар» шарафини ҳимоя қилган. У «Парма», «Лацио» ва «Интер» сингари гранд клубларда тўп сурган. Ортга қайтгач, Жозе Моуриньонинг ғалабали даврига қадар сабр қилишни истамади ва 2004 йилнинг бошида «Порту»ни тарк этди.

2017 йилда эса, у яна «Драгао» аренасига қайтди. Бу сафар мураббий сифатида! Айни дамда, «Порту»нинг барча мусобақаларда ишлари яхши кетмоқда. Консесау аллақачон жамоаси билан 5 та совринга эга чиқди. Эндиликда у Европа Чемпионлар Лигасининг плэй-офф учрашувларига тайёргарлик кўриш билан банд.

Яхёхўжа Улуғхўжаев