Про-лигадаги интрига ҳамда кураш Суперлиганикидан асло қолишмаяпти, бунга ишонаверинг. Бугун 10-тур баҳсларига старт берилди.

Ғиждувондаги “Наврўз” стадионида “Бухоро” клуби Тошкетнинг “Оқтепа” жамоасини қабул қилди. Баҳс шу қадар ҳужумкор ва кескин тарзда ўтдики, якунда унинг натижасини ҳеч ким тахмин қила олмасди. Одатда 3:3 ҳисоблари кўп ҳам кузатилмайди. Лекин бундай натижа аслида ноодатий эмас. Бироқ 0:3 ҳисобини 3:3 га айлантирса-чи, боз устига ўйин тугашига 8 дақиқа қолганида! Бугун шундай бўлди.

Суперлигага қайтиш учун курашаётган “Бухоро” “Оқтепа”га қарши учрашувда камбэк қайд этди. Айнан мана шуни чинакам камбэк деса бўлади. Кези келганда айтиш керакки, айрим пайтларда 0:1 ёки 1:2 ҳисобларидан кейин дуранг ё ғалабалар кутазилса ҳам камбэкка қиёслаяпмиз. Лекин чинакам камбэкни “Бухоро” мисолида кўрдик.

ПФЛ бош директори Диёр Имомхўжаев ҳам ўзининг телеграмдаги каналида ушбу ўйинга атаб шундай ёзди: “Бухоро”дан дахшати камбэк. “Оқтепа” 80-дақиқадан кейин учинчи голни уриб, ҳисобни йирик кўринишга олиб келяпти. Қолган 10 дақиқа ичида “Бухоро” 3 та гол уриб, ҳисобни тенглаштиряпти. Ҳам ҳайратга тушасан, ҳам хавотирга”.

Хуллас, шунақа гаплар. 84-дақиқагача бирорта гол уришни уддалай олмаган “Бухоро” қолган дақиқаларда нақд учта гол урди! Натижада “Оқтепа” оғзидаги ошни олдириб, тайёр ғалабадан мосуво бўлиб ўтирибди. Бу каби ўйинлар доим ҳам кузатилавермайди. Мазкур ўйин тугаганидан кейин жамоани вақтинча бошқариб турган Мирислом Ҳасанов sports.uz мухбирига ўз таассуротларини қуйидагича изҳор қилди:

хасанов1_2

- Ўйин давомида бизнинг голга тортадиган вазиятларимиз кўп бўлди. Афсуски, ўзимиз қарши ҳужумларда рақибни ўтказиб юбордик. Гарчи ҳисоб биз учун салбий кўриниш олган бўлса ҳам футболчиларимиз тушкунликка тушмади, қайтанга ўзларида куч топдилар ва охиригача курашдик. Ишонасизми, ҳаттоки ютиб кетишимиз ҳам мумкин эди, озгина қолди. Учрашув жуда қизиқарли ва ҳужумкор руҳда кечди. Яна нима дейишим мумкин? Ҳа, ҳаво ҳарорати анча иссиқ эди. Лекин бу баҳона сифатида ўтмайди. Майдонда иккита жамоа курашди. Боя айтдим, бизда имкониятлар кўп эди, ҳаммасидан ҳам унумли фойдалана олмадик. Лекин йигитларга раҳмат, ҳакамнинг охирги хуштагига қадар курашишди. 0:3 ҳисобини якунда 3:3 га айлантира олдик.

Лекин “Бухоро” нима учун 0:3 бўлгунга қадар “ўйнамади”? Бу ҳам ўйлантирадиган савол. Мураббий айтганидек, голли имкониятлар кўп бўлган. Мирислом Ҳасанов ҳисобнинг 0:3 га келиши қандай юз берганига ҳам тўхталди.

- Ўйин ёмон бошланмади. Бироқ дарвозамиздан биринчи голни ўтказиб юборганимиздан кейин бор эътиборимизни ҳужумга қаратдик. Натижада рақибда қарши ҳужумларга ўтиш имконияти пайдо бўлди. Шундай қилиб, улар иккинчи ва учинчи голларни ҳам киритишди. Кимнидир айблай олмайман, позицион хатолар ва бўш ҳудудлар рақибга қўл келди. Чунки биз ҳисоб ўзгаргани сари гол урамиз деб ҳужумга ўтавердик, бундан эса “Оқтепа” футболчилари фойдаланиб кетавердилар. Лекин шунда ҳам футболчиларимизга миннатдорчилик билдираман. Улар муносиб курашишди. Мағлубиятдан қутулиб қолдик.

бухоро октепа

“Оқтепа” учинчи голни 80-дақиқада киритди. Шундан кейин “Бухоро” гўёки “уйғонди”. 85, 86 ҳамда 90+3-дақиқаларда мезбонлар бирин-кетин рақиб дарвозаси тўрини нишонга олдилар. Одатда, 80-дақиқада жавобсиз учинчи голни ўтказиб юборган жамоа ва унинг мухлислари мағлубиятни тан олишади. Қизиқ, “Бухоро”да ҳам шу нарса сезилдими? Мураббий Мирислом Ҳасанов ўша вақтларда мағлубиятни тан олганмиди ёки...

- Биласизми, ўйин тобора якунланиб борар экан, ҳаммаси мағлубиятимизга қараб кетаётганди. Қачонки, учрашувда биринчи голни рақиб дарвозасига урганимиздан кейин бизда умид учқунлари пайдо бўлди. Айнан шундан сўнг, ўзимизга бўлган ишонч ортди. Йигитлар натижани ўзгартириш мумкинлигини ҳис қилишди. Аслида вазият бошқача бўлиши ҳам мумкин эди. Бироқ айрим пайтларда омад етишмади деб ўйлайман, - дея муносабат билдирди, “Бухоро” мураббийи.

Майли, ҳартугул “Бухоро” ўз уйида қўрқинлик мағлубиятдан қутулиб қолди. Футболда шунақаси ҳам бўлиб турарканда?! Мазкур ўйин муҳокамаси сабабли Мирислом Ҳасанов билан мулоқотимиз якунида ундан яна иккита масала ҳақида сўрадик: бу каби учрашувдан кейин футболчиларга эътироз борми ва бугун жамоаси бир очкони қўлга киритдими ёки икки очкодан маҳрум бўлдими?

хасанов_6

- Футболчиларга эътироз йўқ. Улар майдондаги вазифаларни бажаришди ва қийин вазиятдан муносиб чиқиб кета олишларини кўрсатишди. 0:3 дан кейин қўлларини тушириб қўйишмади. Ирода ва характер кўрсатишганидан хурсанд бўлдим. Аслида эса ютқазишимиз мумкин эди. Аммо майдондаги йигитларимиз бундай бўлишига йўл қўймадилар.

Бугун жамоамиз икки очкони йўқотди деб ҳисоблайман. Ўз олдига Суперлигага чиқиш вазифасини қўйган жамоа имкон қадар кўпроқ ғалаба қозониши керак, айниқса, ўз майдонида. Лекин биз бундан кейин ҳам ишлашда давом этамиз. Олдинда яна ўйинларимиз бор. Ғалабалар орқали мухлисларимизни хурсанд қилишга ҳаракат қиламиз, - деди “Бухоро” мураббийи.

Эслатиб ўтамиз, “Бухоро” клуби бундан аввал, аниқроғи, ўтган турда про-лиганинг яққол пешқадами – “Нефтчи”га ҳеч қандай имконият қолдирмасдан рақибиин 2:0 ҳисобида мағлубиятга учратганди. Бу сафар ўртамиёна рақиб  - “Оқтепа”га сал қолса...Қолгани ўзингизга ҳавола!

Матнда хатолик топсангиз, ўша хатони белгилаб, бизга жўнатинг (Ctrl + Enter)

Фикрлар

Фикр қолдириш учун авторизациядан ўтинг!
Raxim Maxmud
07/06/2021 01:09
Булиши мумкин
&
Турсун Ғани
06/06/2021 23:49
4:3 қилмабдида Бухоро. Диёр Имомхўжаев нимасига ўйланади ҳисобни. Камбек деб қўяқолсин.