"Buxoro" bosh direktori: "Fuzaylov bilan xayrlashmadik"

Pro ligadan Superligaga qaytgan “Buxoro” jamoasi 4 ta o‘yinda 1 g‘alaba va 3 mag‘lubiyat qayd etganini bilasiz.

Garchi chempionatni g‘alaba bilan boshlagan bo‘lsa-da, keyingi uchta bahsda mag‘lubiyatlar seriyasi ulanib ketdi. Natijada bosh murabbiy o‘zgartirildi. Muxlislarga yaxshi tanish bo‘lgan Ulug‘bek Baqoev “Buxoro”ga qaytdi.

Tojikistonlik mutaxassis Hakim Fuzaylov endi bosh murabbiy emas. Mahalliy muxlislar Baqoevning qaytishini yaxshi yangilik sifatida qarshi oldilar.

“Buxoro”dagi bosh murabbiy o‘zgargani xususida klub bosh direktori O‘tkir Qodirov Sports.uz jurnalistiga quyidagilarni aytdi:

"Ha, jamoamizda bosh murabbiy o‘zgardi, - deya gap boshladi, O‘tkir Qodirov. - Bilasiz, oxirgi uchta o‘yinda mag‘lubiyatga uchradik va bu albatta rahbarlarni ham, muxlislarni ham qoniqtirgani yo‘q. Shu bois to‘g‘ridan-to‘g‘ri Ulug‘bek Baqoev bilan aloqaga chiqdik. O‘zi buxorolik va ilgari shu erda ham ishlagan. Buxoro futbolini yaxshi biladi. Shuning uchun Baqoevni bosh murabbiylikka taklif qildik.

Jamoamiz oldiga qo‘yilgan vazifa o‘zgarmaydi. Har doim muxlislarni xursand qilish va klubni yuqori o‘rinlarga olib chiqish.

Hakim Fuzaylov garchi bosh murabbiylikdan bo‘shatilgan bo‘lsa-da, u jamoamizni butunlay tark etgani yo‘q. Hakim Qayumovich “Buxoro”da maslahatchi murabbiy lavozimida ishlashda davom etadi. Baribir uning klubimizda amalga oshirgan ishlarini, mehnatini unutmaymiz. “Buxoro” Superligaga chiqa olmay yurgan vaqtida Fuzaylov kelib jamoani elitaga olib chiqa oldi. Shuning uchun Hakim Qayumovichning qilgan mehnatlarini inobatga olib, butkul xayrlashmadik. Baribir qishda selektsiyani uning o‘zi olib borgan. Shu sababli Baqoevga yordam berib turadi.

To‘g‘risini aytganda, jamoamiz nima sababdan oxirgi uchta o‘yinda mag‘lubiyatga uchraganining sababini bilmayman. Holbuki, o‘yinimiz chakki emasdi. Chempionatni safarda “Turon”ga qarshi ajoyib g‘alaba bilan boshlagandik. Bir futbolchi kam bo‘lgan holda xarakter ko‘rsata olgandik. Lekin oxirgi uchta uchrashuvda nimagadir natijalar biz kutgandek chiqmadi. Biz buni faqat omad kelmaganligi bilan izohlashimiz mumkin. Ammo moliyaviy tomondan hech qanaqa muammo yo‘q. “Turon”ni yutgan o‘yindagi mukofot pulini to‘ladik. Yanvar va fevral oylari uchun maoshlarni ham berganmiz. Biz tomondan qilinishi kerak bo‘lgan barcha ishlar bajarilyapti, kamchiliklar yo‘q. Umid qilamizki, Ulug‘bek Baqoev boshchiligida jamoamiz ishqibozlarimizni g‘alabalar bilan xursand qila oladi”, - deydi bosh direktor.

Shuhratbek Jo‘raev.