“Buxoro” O‘zPFL tomonidan qo‘yilgan talablarni bajarishga kirishdi

8 fevral kuni “Buxoro” futbol klubi bosh direktori O‘tkir Qodirov hamda klub buxgalteri 2023 yilgi mavsum uchun smetani kelishish maqsadida O‘zbekiston futbol assotsiatsiyasida bo‘ldi. Yig‘ilish davomida Liga “Buxoro” futbol klubi infratuzilmasi yuzasidan o‘z takliflarini kiritdi va faqatgina shu asos bilan yangi futbolchilar ro‘yxatdan o‘tkazilishini ma’lum qildi.

Natijada “Buxoro” smetasiga qisman o‘zgartirish kiritildi. Unga ko‘ra, yaqindagina yangilangan “Buxoro sport majmuasi” maydoni parvarishi uchun smeta doirasida mablag‘ ajratiladigan bo‘ldi. Nafaqat majmuada, balki viloyat miqyosida ham futbol maydonini parvarish qilish uchun mo‘ljallangan texnika yo‘q ekanligidan kelib chiqib, futbol klubi mazkur faoliyatga ixtisoslashgan tashkilot bilan rasmiy kelishuv imzoladi. Kelishuv doirasida tashkilot “Buxoro sport majmuasi” hamda “Umid” stadioni maysasi parvarishi bilan 2023 yil so‘ngiga qadar mashg‘ul bo‘ladi (mazkur tashkilot maydonni hozirgi ko‘rinishga keltirgan va uni 2022 yilgi O‘zbekiston kubogining final o‘yiniga qadar tayyorlagan). Bunda mahalliy mutaxassislar ish o‘rganish uchun yollanma tashkilotga biriktiriladi. 2024 yilgi mavsumga qadar klub yoki viloyat hokimligi Buxorodagi maydonlarni parvarish qilish imkonini beruvchi texnika xarid qilgach, mahalliy agronomlar keyinchalik yollanma tashkilotsiz ham futbol maydonlari parvarishi bilan mashg‘ul bo‘ladi.

Shuningdek, smeta doirasida “Buxoro” futbol klubi “Umid” stadioni kiyim almashtirish, yuvinish xonalari, inspektor hamda videotasvirchilar uchun mo‘ljallangan hududlarni qayta ta’mirdan chiqarish ishlarini boshladi. Liga talabi bilan ishdan chiqqan barcha texnika olib chiqildi. Mavsum startiga qadar Buxoro neftni qayta ishlash zavodining amaliy yordami bilan yuqorida sanab o‘tilgan hududlar ta’mirdan chiqariladi. Zavod 2024 yilgi mavsumga qadar “Umid” stadionining drenaj va sug‘orish tizimi, maysasini yangilash bo‘yicha kafolat xati ham taqdim etdi.

Endilikda buxorolik futbol muxlislari 2023 yilgi mavsum davomida sifatli futbol namoyish etish imkonini beruvchi, mutaxassislar tomonidan parvarishlab boriladigan futbol maydonida rasmiy uchrashuvlar tomosha qilish imkoniyatiga ega bo‘ladi. Shuningdek, klubning U21 va U19 jamoalari to‘p suradigan stadioni normal ko‘rinishga keladi. 2024 yildan boshlab esa bu erda ham sifatli futbol maydoni bo‘ladi.

Quyida chimning 2022 yil oktyabr va 2023 yil yanvar holati bo‘yicha ko‘rinishi bilan tanishing.

O‘zPFL matbuot xizmati