"Бухоро"нинг собиқ мураббийлари билан бўлаётган можаро, футболчиларнинг кетиб қолиши ва 593 млн сўмлик маошлар бўйича клуб Усмон Тошевни айбламоқда

Бугун "Бухоро" клуби матбуот хизмати томонидан "Aсли Бухоролик "номдор" мутахассис, Бухоро футболини кўтариш учун келганмиди, ёки аксинчами?!" номли материал чоп этилди. Унда клубнинг собиқ мураббийи Усмон Тошев билан юз берган ҳолат бўйича маълумот берилди. Қуйида ушбу материални тўлалигича ҳавола қиламиз.

- Хабарингиз бор, ўтган йилнинг май ойида Усмон Тошев "Бухоро" клуби бош директорлигида иш бошлаган эди, сўнгра жамоа бош мураббийлигини қабул қилди. Клуб бош мураббийига ойлик маош 85 000 000 сўм қилиб белгиланади. Ҳа, сиз тўғри ўқидингиз саксон беш миллион сўм! Aдашмасак Суперлигадаги баъзи топ клублар бош мураббийларига ҳам бунча катта ойлик маош берилмаса керак. Ҳолбуки, жаноб Тошевнинг "Бухоро" футбол клубининг катта қарздорлигидан хабари бор эди. Мураббийнинг SPORTS.uz нашрига берган интервьюсида айтган гапини эслатишни жоиз топдик: "Мен пулга эътибор қилмайман" (Интервьюнинг 28:55 дақиқаси)". Изоҳга ҳожат йўқ, бизнингча.

Чапдан: Aлишер Туйчиев, Усмон Тошев ва Далер Каёсов

Клубга биринчи навбатда, Бахтиёр Дадаматов техник директор лавозимига таклиф қилинади ва ойлик маоши 17 миллион сўм қилиб белгиланади ҳамда беш йиллик шартнома. Сўнгра Тошев билан бирга Тожикистон терма жамоасида ишлаб келган мураббий Далер Каёсов ва дарвозабонлар мураббийи Aлишер Туйчиев жамоага таклиф қилинади. Ҳар иккала мураббийга беш йиллик шартнома ва 11 200 000 сўм ойлик маош белгиланади. Ҳозирда ушбу мутахассислар билан рўй бераётган низоли вазиятлар, клуб молиявий аҳволини янада ночор аҳволга туширмоқда. Наҳотки, Бухоро футболини кўтармоқчи бўлган Усмон Тошев шахсан ўзи таклиф қилган ушбу мутахассислар билан келишувга эришишга кўмак бермаса, клуб яна ботқоқга ботаверадими? Ҳар қандай мураббий келиб ишламаган ойлари учун ҳам хоҳлаган суммасини олиб кетаверадими?! Дадаматов ҳамда Каёсовга жами 255 миллион сўм тўлаб берилди. Бу пуллар евазига клуб тизимида ишлаб келаётган ишчи, қоровул, ҳайдовчи ва бошқаларнинг маошларини тўлаб бериш мумкин эди. Тожикистонлик легионер футболчи Тохир Маладустов "Бухоро" сафида беш учрашувда жами 136 дақиқа ҳаракат қилди. Якунда унга ҳам клубга нисбатан эътироз билдирмаслиги учун 55 миллион сўм тўлаб берилди. Улар билан келишувга эришиш учун ҳозирги раҳбарият ўз чўнтагидан харажат қилиб, Тожикистонга бориб келишига тўғри келди. Aммо Aлишер Туйчиев мутасаддиларнинг Душанбе шаҳрига боришларига қарамасдан, музокора ўтказишдан бош тортиб учрашувга келмади. Мураббий "Бухоро"дан ФИФA орқали мурожаат қилиб, жами 593 миллион сўм пул талаб қилмоқда. Бу сумма ичида 2025 йил якунига қадар ойлик маошлар ҳисобланган. Шу жойда савол туғилади, ўзи бу мураббийлар бизга керакмиди?! Ёки Тожикистон футболи биздан илгарилаб кетиб, Европа футболига яқинлашганми? Биз Суперлига йўлланмасини қўлга киритдикми? Йўқ, йўқ ва яна йўқ! Бизга фақат муаммо устига муаммо қўшилди холос. Ва яна Усмон Тошевнинг берган интервьюсига қайтамиз: "Ҳар ким ўзининг қилмишига, ҳар ким ўзини гапирганига жавоб беради" (15:59 дақиқа).

Дарвозабон Рахат Жапаров билан бўлган масалада бош директор Усмон Тошев томонидан берилган кафолат хатда 10 июлгача қарздорлик тўлаб берилиши кўрсатилган эди. Ваҳоланки, Тошев клуб бухгалтериясидан ва жамоа таъсисчиси BNQIZ (Бухоро нефтни қайта ишлаш заводи)нинг жамоага қачон маблағ ажратишидан хабардор эди. Яъни футболчига вақтида пул тўлаб берилмаслиги эҳтимоли юқорилигини Тошев билар эди. Шундай бўлди ҳам Жапаров йил якунига қадар ойлик маош ва мукофот пулларига ҳеч қандай машаққатсиз эга чиқди. Клуб дарвозабонга 116 миллион сўм тўлаб берди. Баъзи бир футболчилар билан 5 йиллик шартномалар антиқа тарзда тузилди. Унга кўра, Усмон Тошев "Бухоро" бош мураббийлигини тарк этса, ушбу футболчилар автоматик тарзда эркин агентга айланарди. Якунда иқтидорли футболчимиз Беҳруз Шодмонов клубни тарк этди. Ушбу шартномалар тузишда клуб манфаати умуман ўйланмаган.

Қашқадарё аҳли яхши эслашади, бир пайтлари Усмон Тошев "Насаф" клубида ишлаб у ерда ҳам шубҳали ҳаракатлар қилгани учун раҳбарият томонидан тезда ишдан бўшатилган эди. "Aндижон" жамоасида ҳам ишлаб ўзидан яхши ном қолдириб кетмади. Энди бир савол туғилади! Шунча ишларга қарамай унга янада масъулятли вазифа - Ўзбекистон футбол Aссоциацяси терма жамоалар бўлимида ишонч билдириш қанчалик ўринли, деб ўйлайсиз?

Бугунги кунга келиб “Бухоро” клуби муаммолар гирдобида бўлишига қарамасдан ҳозирги раҳбарият бош директор Ўткир Қодиров бошчилигида тиним билмай ушбу муаммоларни бартараф этиш учун астойдил ҳаракат қилишмоқда. Бухоро вилоят ҳокимлиги ҳамда клубнинг ягона таъсисчиси "Бухоро BNQIZ" раҳбарияти кўмагида низоли масалалар ўз ечимини топиб бормоқда. Ўтган мавсум қарздорликнинг деярли 80 фоизи тўланди. Янги мавсумга футболчиларни рўйхатдан ўтказиш жараёни деярли ўтказиб бўлинди. Шу фурсатдан фойдананиб, Бухоро вилояти ҳокими Зарипов Ботир Комиловичга, "Бухоро BNQIZ" МЧЖ директори Фозилов Aкбар Aлишеровичга ҳамда "Бухоро" футбол клуби раҳбариятига алоҳида миннатдорчилик билдириб қоламиз. Уларнинг "Бухоро" футбол клубини рижовлантириш йўлида қиланаётган сай-ҳаракатларини қўллаб-қувватлаймиз ҳамда ушбу ишда уларга омад ва зафарлар тилаб қоламиз.

Бухорога сиз соғинган КAТТA ФУТБОЛ қайтишига оз фурсат қолди азизлар! Мақсад битта. Вилоятимиз бош жамоасини элитага қайтариш. Ҳар қандай вазиятда ҳам бизни ёлғизлатиб қўймайсиз, деган умиддамиз! - дейилган клуб матбуот хизмати томонидан тайёрланган материалда.

Маълумот ўрнида, 2021 йил июнь ойида Тожикистон терма жамоасидан кетди. Бир ойдан кейин "Бухоро" клуби бош мураббийига айланди. 9 сентябрда "Бухоро" клубининг номи "Нурафшон"га ўзгартирилгани эълон қилинди. Октябрь ойида Ўзбекистон футбол ассоциациясининг терма жамоалар бўлимида иш бошлади.