"Buyuk ustozdandan hikoyalar": Mixail Anga tan bergan afsonaviy murabbiy haqida eshitganmisiz?

Ikki kun avval ustozim taniqli jurnalist, ayni vaqtda PFL da ishlayotgan Oybek Yunusov Samarqand shahrida tadbir bor, borasanmi?-deya so‘radi. Odatda, Oybek aka bunday tadbirlarga doimo, “buyuk ustoz” Axbor Imomxo‘jaev bilan chiqadi. Shunday bo‘lsada, hamrohlar kim ekanligini so‘radim va tabiiyki o‘zim kutgan javobni oldim. To‘g‘ri avval ham bir-ikki marta u inson bilan birgalikda safarga chiqish baxtiga muyassar bo‘lganman. Lekin unda biroz yoshroq bo‘lganligim sababli, imkoniyatdan foydalana olmagandim. Ya’ni, afsonaning o‘zidan “Paxtakor” 79 ning o‘ziga hos tarixi haqida batafsil ma’lumot olishga biroz tortinish bo‘lgandi.

Bu safar, menga shunday imkoniyatni taqdim etdi. Garchi, “samoga sochilgan yulduzlar”ning bevosita o‘yinlarini tomosha qilmagan bo‘lsamda, yoshligimdan ongimga betakror jamoa hamda o‘yinchalarimiz bo‘lganligi singib ketgan edi. Chunki futbolga qiziqish biz uchun ota kasb. Chunki dadam ham millionlar o‘yinining ashaddiy ixlosmandlaridan. O‘sha mashhur aktyor Ergash Karimovning hayotiy ifodalaridan biri desam mubolag‘a bo‘lmasa kerak. Xullas, dadam kerak bo‘lsa, Pele, Ziko, Stefano, Eysebio, Pushkash, Charlton, Maradonalardan o‘zimizning Mixail Anni ustun qo‘yardi. Doimo, biror bir futbolni birgalikda tomosha qilayotgan bo‘lsak, “exx An bo‘lgandami”-deb qolardi. Shu tufaylimi bilmadim mening ham ushbu futbolchiga mehrim tushgandi.

Mixail An bilan elkadosh bo‘lgan insondan u haqida eshitish esa men uchun ta’riflab bo‘lmaydigan voqeylik bo‘ldi.

Qisqasi ustozdan o‘sha davrning barcha futbolchilari haqida so‘rab chiqdim. Ayonki, An borasidagi savollarim ko‘prog‘ini tashkil qildi.

Mazkur safar davomida bu borada rukn qilish niyati paydo bo‘ldi...

Shunday qilib, bugungi ruknimizga asos solindi. Uni “Buyuk ustozdandan hikoyalar” deb nomladim. Sport jurnalistikamizning tirik afsonasidan eshitganlarimni siz bilan baham ko‘rmoqchiman. O‘ylaymanki, bu sizga manzur keladi.

Mixail Anga raqib murabbiyi tan bergandi

- Aniq yili hozir esimda yo‘q. Valeriy Lobanovskiy Dnepropetrovskning “Dnepr” jamoasini boshqarar edi. (Mal.uch. Lobanovskiy 1968-1973 yillar ushbu klubda murabbiylik qilgan) Biz ushbu klubni qabul qildik. O‘sha o‘yinda “Paxtakor” 2:0 hisobida ustun keldi. GOLlarni har ikkisini Mixail urdi. Ne ko‘z bilan ko‘ring-ki, Valeriy Lobanovskiy ikkinchi urgan to‘pidan so‘ng, uning mahoratiga tan bergandi. Ya’ni ushbu GOLdan keyin uni uzoq vaqt olqishlab turgandi. Keyinchalik u intervyularida ham futbolchimiz haqida ko‘plab iliq fikrlar bildirgan.

Kuzatib boring, kelgusi safar yanada qiziqarli hikoyalar kutib turibdi...