"Челси" футболчиси ёзда жамоани тарк этади

Франциялик ҳучумчи Кристофер Нкунку жорий ёзда Лондоннинг “Челси” жамоасини тарк этади. Бу ҳақда журналист Бен Жейкобс хабар берди.

Маълумотларга кўра, футболчи январда уни олиб келмоқчи бўлган “Бавария” таклифига мамнун бўлар эди ва бу вариант ҳозир ҳам уни қизиқтирмоқда. Шунингдек, Нкунку Англия чемпионатида қолиш имкониятини ҳам истисно қилмаяпти.

АПЛ клублари орасида унга энг жиддий қизиқишни “Тоттенхэм” билдирмоқда. Шу билан бирга, “Ньюкасл” ва “Ливерпуль” ҳам трансфер эҳтимолини кўриб чиқмоқда.

Эслатиб ўтамиз, Нкунку 2023 йили “РБ Лейпциг”дан “Челси”га 60 миллион евро эвозига келган эди. Ўтган мавсумда у АПЛда 27 ўйинда майдонга тушиб, 3 та гол ва 2 та ассист қайд этди.