“Челси” бош мураббийи Томас тухель 19 ёшли ҳужумкор футболчи Нони Мадуэкени ўз жамоасига қўшиб олмоқчи.

Айни пайтда англиялик футболчи ПСВ таркибида Нидерландия чемпионатида тўп тепмоқда. Истеъдодли ёшлар сирасига кирувчи Мадуэке футбол сир-асрорларини “Кристал Пэлас”да ўргана бошлаган. 2014 йилда уни “Тоттенхэм” академиясига жалб қилишган.

Нони 2018 йилда ПСВ академиясига кўчиб ўтди ва бир йилдан сўнг, ўринбосарлар жамоаси – “Йонг ПСВ” таркибида Нидерландия чемпионатининг иккинчи даражали турнирида дебют қилди.

2020 йилдан бери мамлакат чемпионатининг олий лигаси – Эредивизида ўйнаб келмоқда. Айни пайтга қадар ёш бўлишига қарамай, Мадуэке ПСВ учун 50 та учрашув ўтказиб, 15 та гол урди ва 9 та голли пас муаллифи бўлди.

Бу ўйинчига “Челси”дан ташқари “Тоттенхэм” ва “Манчестер Юнайтед” ҳам даъвогарлик қилмоқда.